خلصتم انتخابات ؟؟؟ تعالوا عاوزكم فى حاجه كده

من طرف **k_I_A_S_B** الثلاثاء 30 نوفمبر 2010, 1:19 pm

خلصتم انتخابات

أرتحتم ؟؟

أه صحيح أصل قبل لما أتكلم

بصوا بقى علشان اللى أوله شرط أخره نور

ده مش مقال من الأخر

ده حاجه تانيه كده بس مش لاقى ليها أسم

المهم

الخلاصه

بكلم عن المحروسه الانتخابات

دماغنا وجعنا وجالنا صداع .... ( على رأى أمى )

أنتخابات ايه

كله أنكشف وبان

أولا ممنوع رفع الشعارات الدينيه يا جماعه لأن الشعارات الدينيه زى الأخوان مثلا هى تقسيم للصف يعنى مثلا لو واحد قال الإسلام هو الحل يبقى بيضطهد المسيحيين وبيعتبرهم جزء معزول من الموطن

أما الرئيس بقى فديما شعاره الهلال اللى هو مش رمز إسلامى ولا حاجه أستنوا أنتوا فاهمين غلط

الهلال ده اللى هو طور من أطوار القمر

يعنى هو زى القمر

أو زى طور معين من أطوار القمر لا مؤاخذه

أما بقى الإخوان صدعونا وكل شويه يروحوا الأنتخابات ينضربوا

بجد حاجه تقرف ... يعنى مش كل ده ضعف للميزانيه العامه للدوله

شوفوا بقى مصر صرفت كم مليون جنيه على الأسلحه البيضاء وعلى المطاوى والعصيان اللى الإخوان أنضربوا بيها ده غير أجر البلطجيه اللى كانوا واخدين بدل تفرغ اليوم ده

كل ده على مين وعلى حساب مين

على حسابنا وكله بسبب الإخوان اللى تسببوا فى ضياع أموال من ميزانية الدوله

مش بس كده

كمان مش بيعرفوا ينضربوا صح

بيخلوا العصيان والمطاوى تبوظ

حاجه تخنق بصراحه

واللى بصراحه أستفزنى جدا هو ان كل واحد يقولك هو أزاى الوزير مترشح فى مجلس الشعب

وهو أصلا تاجر مشهور أو رجل أعمال ههههههههههههه وكمان وزير

وبقى كمان عاوز يبقى عضو فى البرلمان ههههههههههههههه

شعب ناكر للجميل

يعنى الراجل شغال ثلاث اعمال

الصبح بيشتغل راجل اعمال وبعد الظهر بيشتغل وزير علشان لقمة العيش وأنتم عارفين أد أيه الحياه صعبه وظروفها والأسعار نار

حب يحسن دخله فراح يشتغل عضو مجلس شعب

فيها أيه دى ؟؟

مش رزق حلال

وبعدين هو انتم كمان هتدخلوا فى النيات

هو بيشتغل تاجر ويبيع لنفسه بما يرضى الله من أموال الدوله ولما بيجيله الورق بتاع الصفقات اللى هو داخل فيها بحكم ان هو رجل أعمال بيختار نفسه كفائز فى كل المناقصات بحكم ان هو وزير

وكله بما يرضى الله

وبعد كده بيروح مجلس الشعب

يقدم أستجواب فى نفسه ويستجوب نفسه ويطلع برىء

واهم حاجه أيه

أحفظوا بقى ههههههههههه

بما يرضى الله

شعب غريب

الحكومه مقطعه نفسها عليهم وهم مش فاهمين هههههههههههههههههه

واللى زاد وغطى غير الإخوان هو الأخ حمدين صباحى

يا حمدين حرام عليك أنا هكلمك بصراحه

أنت هضيع البلد

حرام عليك بطالب بحقوق الفلاحين وبطالب بحل البطاله

وبطالب بأن الفقرا يكونوا عايشين حياه كريمه

ليه هو ربنا مش خلق الناس طبقات

أعترض بقى على حكم ربنا

شىء غريب

وبعدين فيها أيه لما المنافس بتاعك يضرب رصاص على الناس

وفيها أيه لما الحكومه تضرب عليكم قنابل مسيله للدموع

هى بتعمل لمستقبلكم أنتم مش فاهمين

أنت ليل نهار تقولى بنطالب بحقوق الفلاح

عاوزين فلوس للناس البسيطه

وان الحكومه بتاخد فلوس الناس ههههههههههه

انت مش واخد بالك

الحكومه بتاخد الفلوس مننا وبتحوشها لينا

وبتشيلها فى الحصاله

علشان لما نكبر نلاقى حاجه تنفعنا

أمال هو أيه

من أجل مستقبل أولادك ههههههههههههههه

واللى يغيظ أكتر أن كل الناس أدت حمدين صباح صوتها ومحدش ادى عصام عبد الغفار خالص وعبد الغفار هو اللى يفوز والناس تستغرب

مش عارف مستغربين ليه ههههههههههههه

مش فاهمين

هفهمكم

أصل الحزب الوطنى مش تافه ولا بياخد بالكم بس

بياخد كمان بالكيف

يعنى ممكن صوت واحد للوطنى يكون بعشر أصوات أما صوت لصباحى فهو بصوت واحد ههههههههههه

وطبعا ده مبدأ شرعى لأن صوتك للحزب الوطنى حسنه ليك

والحسنه بعشر أمثالها والله يضاعف لمن يشاء

أما بقى اللى مش فاهمين يقولك بيحطوا أصوات بدل الموتى وبدل اللى مرحوش

شعب جاحد وناكر للجميل

يعنى اللى مات خلاص ننساه أكيد باقى فى قلوبنا ولازم نحطله صوته وأكيد لو هو عايش كان أدى صوته للوطنى أمال هو مات ليه ؟؟ ههههههههههههه مهو ده السبب

وبعدين الناس برضه تعبت نفسها وخرجت

مع ان الحكومه بتحطلنا صوتنا من غير ما نروح اللجان وبتختار لينا برضه الحزب الوطنى

يا جماعه هو أحنا هنعرف مصلحتنا أكتر منهم

هم كبار برضه وفاهمين

واللى زاد وغطى هو بقى النائب مصطفى بكرى

اللى الدوره اللى فاتت وهو عضو عمال يكشف لينا قضايا الفساد

وهتكلم عن قضيتين بالتحديد

قضية القمح اللى بكرى قال فيها وأثبت ان الحكومه كانت بتستورد لينا قمح مواشى وتخلينا ناكله

ومع ان الناس كانت بتاكل وساكته ومحدش يعرف ألا أن بكرى لما قال سد نفس الناس عن الأكل وخلاهم يقلقوا

وطبعا كده كده هو مواشى برضه ومش هيتغير هههههههههه

فسد نفسنا وخلاص

والقضيه التانيه هى الميه الملوثه

بيقول بكرى ان الماء اللى بنشربه مختلط بالبول ههههههههههههه

والله دى مناعه ......... مناعه طبيعيه

حكومه شفافه

وحزب شفاف

منكم واليكم ولكم وفيكم

ههههههههههههههههههههههههههه

فكان لازم بكرى يسقط لأنه سد نفس الناس عن الأكل والشرب

أما بقى الدكتور سيد مشعل

اللى نجح هههههههههههه

عمره ما عمل قلق ولا سمعنا عنه حتى ولا فى طبق اليوم ههههههههههه

علشان كده كان لازم ينجح

وهختم بقى بالنائب عبد العليم داود لانه حبيبى جدا وبحترمه جدا وكل مره كنت أشوفه كنت أحاول أفهمه بس هو مش راضى يفهمنى

كل مره يروح يعتصم ويطالب بحقوقنا وبحقوق الفقراء

وبحقوق الغلابا

حتى كان عضو فى الوفد وفصلوه لأنه قال لا لخداع البسطاء

ومش بس كده

كل مره وقت مناقشة الموازنه يروح يتعارك مع كبير الحزب الوطنى

عمو احمد عز

وكل مره أقوله بلاش تتعارك مع عز

خليك بعيد عنه المجلس واسع

ولو عملك حاجه روح قول لعمو فتحى سرور هو هيجيبلك حقك

برضه مش بيسمع الكلام

ويروح يتعارك مع عز

وفى الأخر

ينضرب ويتبهدل ويتحول للجنة القيم

ومش بس كده

الناس كمان فى مدينة فوه وفى مدينة مطوبس ههههههههههه

بيروحوا ينتخبوه وبيضحوا بروحهم

وعلشان كده الحزب الوطنى قرر يعطى مكفأه لداود

وهى انه يضمه للحزب الوطنى

إلا انه رفض

شوفتوا بقى

حد يرفص النعمه برجليه هههههههههههههه

خلاص يبقى ميستحقش يدخل البرلمان ويستحق يسقط بعد لما نجح

وطبعا داود عمل دلوقتى إضراب عن الطعام مش عارف ليه هههههههههههه

بس بصراحه كنت بقرأ بحث علمى النهارده وأكتشفت أن الحزب الوطنى ده بجد بجد رائع

المعروف ان عبد العليم داود عنده السكرى

ولقيت فى البحث ان الصيام فى بعض الحالات النادره فى السكرى من النوع التانى بيكون مفيد

واكيد هى دى حالته وعلشان كده الحزب خطط كل ده علشان يضرب عن الطعام ويستفيد

يا سلام عليك يا حزبنا يا جامد

بجد بيعملوا الخير ويرموه هو واللى عملوا فيه الخير فى البحر

بجد اللى نظره قصير او مش بيفهم يقول أنهم بيضروه

لكن اللى نيته سليمه وبينظر لنص القله المليان هيعرف أد ايه الحزب الوطنى بيحبنا

فى النهايه ياريت الإخوان بقى يبطلوا شعارتهم الدينيه

ويتعلموا من الحزب الوطنى

شعار الوطنى الجميل

البلطجه هى الحل

طبعا البلطجه مش عيب ودى بتحصل فى كل حته على مستوى العالم

حتى فى طنطا حصلت بلطجا وحتى فى شبرا حصلت

يعنى مش فى مصر بس زى لما قالوا الإخوان والظاهر ان معلوماتهم مغلوطه ههههههههههه

ها خلصتم الأنتخابات

روحتم على الصناديق؟؟

قدمتم خدمات انتخابيه

وعملتم برامج

عاوزين تغيروا البلد وتصلحوها عن طريق الشرعيه

ها

ها

ها

وأيه كمان

بكرى والأخوان وحمدين سقطوا

والإخوان اللى باقيين فى الغعاده هيسقطوا

وداود يمكن يسقطوه ولو نجح هيلفقوله أى قضيه

ها

فهمتهم ؟؟؟

طيب

اللى فهمه تقيل شويه يجى يسمعنى فى السطرين دول

لن يحدث تغيير فى مصر بالأنتخابات وقولت ذلك قبلها
شكرا للإخوان أنهم دخلوا وضحوا بدماء وبأرواح ليفضحوا لنا التزوير

شكرا يا أستاذ حمدين أنك تعرضت لمحاولة أغتيال مرتين ودخلت الأنتخابات وتعرضت لمخاطر كثيره ولكن حاولت وفضحت التزوير

شكرا للنائب المحترم مصطفى بكرى الذى فضح جرائم الحزب الوطنى الدوره الماضيه والذى كافح وناضل من أجلنا

شكرا محمد عبد العليم داود يا بطل يا محترم يا نظيف اليد

ولكن الان بعد ان أدركنا جميعا أن من يحكومنا قد أحكموا قبضتهم على السلطه وأغلقوا كل المنافذ الشرعيه

عليكم جميعا أن تتحدوا مع جموع الجماهير وان تنزلزا للشارع
على الإخوان وبكرى وصباحى وداود أن يتركوا قبة البرلمان بمزوريها ونسلئها ورجالها

وأن ينزلزا معنا الى الشارع وان يعملوا فى الشارع

فى الجامعه وفى المقاهى وفى كل مكان

لغتى التهكميه التى تحدثت بها فى البدايه لا تدل على اليأس او الإحباط كما يفهم البعض ولكن توحى بالأستهزاء وعدم الأهتمام او المبالاه بمن يظلمونا

نحن أقوياء

نحن قادرون

معنا جيل من الشباب

يا أيها الشباب فلتتركوا تامر حسنى قليلا وبدلا من أن تكونوا جيل تامر حسنى فلتتحولوا كلكم الى جيل خالد سعيد

أنها اللحظه الحرجه

لمن يحب مصر عليه ان ينحى روحه ودمه جانبا قليلا

ولنردد جميعا نشيدا تعزفه الحان الدماء على اوتار الأجساد الفانيه أن يحيى الوطن

وطنا وهنبنيه

وطنا وهنصلحه

بلدنا ومش هنسيبها

مش هنهاجر ومش هنسيب البلد

مش هنروح ألمانيا ولا إيطاليا

قاعدين فى مصر

مش هنسيبها

لو هناكل عيش حاف ونشرب مياه ملوثه

هنفضل فى مصر

نلتف بترابها ونعشق فى رمالها

مش هنخاف مش هنستسلم

وهيكون ليما مليون طريقه

ومليون سكه

نخلص بيها من الظلمه

وإذا كان الظلم ساعه وإذا كان الظلم ساعه

فالحق الى قيام الساعه

وإنا غدا لناظره لقريب

بقلمى

من طرف monmona الثلاثاء 30 نوفمبر 2010, 2:10 pm

عندك حق فى كل كلمة قلتها

من طرف الاسد الثلاثاء 30 نوفمبر 2010, 2:46 pm

من طرف الاسد الثلاثاء 30 نوفمبر 2010, 3:08 pm

يا جماعة انا مش عارف مدير المنتدي عايز اية تاني اية حكاية مش هنسيبها دي يا جماعة اللى عايز يهاجر قصدي اللى يعرف اصلا انة يطلع من السجن الكبير اللي هو مصرنا المحروسة يهاجر لان نتيجة الانتخابات دي زي ما يكون الريس بيصلح الكورة لجمال ما فاضلش لجمال غير انة يشوط في الانتخابات الجاية و يبقي الريس و هفكروا يا دكتور خالد انة هياخدها بالتزكية كمان يعني مثلا عايزين جمال يدور علي عقد عمل برة و يسيب مملكة ابوة و بعدين استحملوا بقي مانتوا جالكوا يوسف والي انتوا برضة مصريين يا جماعة خلوة يشتغل ملكنا قصدي رئيسنا بدل ما يطلع يفضحنا برة و كدة كدة احنا بقينا عالة علي شعوب العالم لو رحت كوريا الشمالية او انجوا هتلاقي مصريين كتير قوي صدقوني ليبيا نفسها عملت للمصريين تاشيرة و قريبا الدول الافريقي

من طرف الاسد الثلاثاء 30 نوفمبر 2010, 3:25 pm

يا جماعة انا رائي نشترك مع بعض و نشتريي مركب و نسافر دي ما عادتش بلدنا

من طرف الاسد الثلاثاء 30 نوفمبر 2010, 7:00 pm

يا جماعة انا رائي نشترك مع بعض و نشتريي مركب و نسافر دي ما عادتش بلدن

من طرف الاسد الثلاثاء 30 نوفمبر 2010, 7:27 pm

من طرف **سجده** الثلاثاء 30 نوفمبر 2010, 8:10 pm

لا حول ولا قوة الا بالله

وحسبنا الله ونعم الوكيل

كلامك صح يا دكتور خالد واكد كلنا متفقين معاك

للأسف خلص الكلام ومفيش كلام يقدر يوصف حالنا جاء وقت العمل

بس ممكن شبابنا يفوق باه ويدور علي قدوة تانيه غير تيمو وعمور ؟ وغيرهم ممن أفسدوا عقول وقلوب الشباب ؟

ممكن بأه نبقي رجاله ؟ وصالحين ؟ونبص لمستقبلنا اللي لحد دلوقتي لسه مظلم ونحاول ننور طريقنا ؟
ممكن ؟ ولا صعب ؟
أعتقد ان مفيش حد عاجبه حاله بس السلبيه والتفاهه أسهل حاجه عندنا .
وياريت كلنا نفوق .

من طرف ????? الثلاثاء 30 نوفمبر 2010, 8:30 pm

شكرا على المقال يا دكتور خالد

ديما كلامك بيلخص ويجيب من الأخر

وعلشان كده بنحب ندخل نشوفه

البلطجه هى الحل

يا رب سلم

من طرف ????? الثلاثاء 30 نوفمبر 2010, 8:35 pm

بعد لما كل الناس شافت بلطجة الحزب الوطنى وتزوير الأنتخابات فى اليوتيوب وعلى الجزيره وفى كل مكان

أقولكم يا جماعه أن نهاية الظلم قربت وقربت جدا كمان

شكرا على مقال حضرتك

جمع بين خفة الدم السياسيه ولخص الحال كله فى سطور

بس مش فاهمه أوى قصدك من ان المرشحين ينزلوا الشارع

حضرتك تقصد العصيان المدنى ؟؟

هدى الشبراوى

من طرف ???? الثلاثاء 30 نوفمبر 2010, 10:39 pm

السلام عليكم

شكرا يا دكتور خالد على مقالك المحترم وعلى أسلوبك التهكمى لأن فعلا مينفعش حد يوصف اللى حصل غير كده

وعججبنى وصفك المره دى للموضوع والتطور فى أسلوبك

واللى عجبنى اكتر

هو نظرتك التفائليه للى هيحصل فى مصر

فعلا دى بلدنا واحنا هنبنيها

دى بلدنا وهنصلحها

مش هنسيبها ولا هنهاجر

يارب تكون أفتكرتنى
أنا محمد بتاع عين شمس قبلتك من فتره فى الجامعه وانت ادتنى العنوان ومتوهتش ووصلت

بلدنا وهنبنيها إن شاء الله

بلاش تشاؤم

مصر ديما مرت بظروف أصعب من دى بكتير

بس أحنا المصريين

بنينا الهرم وشيدنا السد ووقعنا بارليف

نسيتم ولا أيه ؟؟؟

من طرف **k_I_A_S_B** الأربعاء 01 ديسمبر 2010, 6:25 am

أزيكم يا شباب

شكرا ليكم كلكم

محمد حبيب قلبى فاكرك طبعا إن شاء الله

شكرا ليكم وكلامكم كله حلو بس خلينا نبدأ أمل جديد بلاش إحباط

بكره هتشوفوا شباب مصر هيعمل أيه

من طرف ???? الأربعاء 01 ديسمبر 2010, 4:43 pm

على فكره يا دكتور مقالات حضرتك القوميه بتعجبنى أكتر من مقالاتك عن الامور المحليه

لكن المقال ده غير وجهة نظرى وأيقنت براعتك فى الجانبين

بجد رائع

وتلخيص شامل لاحداث الأنتخابات كلها وفى شكل فكاهى جامد جدا

انا شايفه أن الطريق مش اسود اوى

وشايفه كمان ان الناس بقوا أيجابيين شويه

وإن شاء الله نتقدم اكثر

من طرف ???? الخميس 02 ديسمبر 2010, 6:31 am

والله عندك حق هم يضحك وهم يبكى

ربنا ينتقم من الظلمه

أسلوبك فى الموضوع ده قريب من أسلوب بلال فضل

وانا بحبه جدا

من طرف فاروق المصرى الجمعة 03 ديسمبر 2010, 8:27 am

ههههههههههههههههههههههههههههههههه

انت جيبت من الأخر يا باشا

البلطجه هى الحل

والتسويد إصلاح ونهذيب

بلاش وجع دماغ

بكرى وصباحى وجعوا دماغ الحكومه يبقى لازم يسقطوا

البرلمان بقى لطيف أووووووووووووى

أولا مفهوش إخوان خالص

ولا فيه حمدين صباحى

ولا فيه مصطفى بكرى ولا جمال زهران ولا علاء عبد المنعم

وضيف لكده ان بقى فيه ستات كتير اوى بعد كوتة المرأه

يعنى بقى حاجه قشطه خالص ههههههههههههههههههههههههههههههه

بقول نضحك بدل ما يجلنا أكتئاب

من طرف Amin الجمعة 03 ديسمبر 2010, 10:19 pm

جزاك الله خيرا ياخللود
ان شاء الله النصرقادم ولوطال العز والطغيان

من طرف سوسو السبت 04 ديسمبر 2010, 6:19 pm

جزاك الله كل خير يا دكتور .. اسلوب رائع

من طرف ???? الثلاثاء 07 ديسمبر 2010, 11:14 am

على فكره دى اجمد حاجه قرأتها عن الأنتخابات حتى الان

بس خلى بالك يا خالد ليكون فى عصافير هنا كمان ؟؟؟هههههههههههه

أنا مستنى عند الشجره ..... هههههههههه

المفروض تكون عرفتنى بقى

دمك خفيف حتى وانت بتكلم فى السياسه
وامتى هشوفك وامتى هتفتح تليفونك المغلق ديما ده هههههه

مبروك على المنتدى الناجح
أخوك

خلصتم انتخابات ؟؟؟ تعالوا عاوزكم فى حاجه كده

خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده

رد: خلصتم انتخابات ؟؟؟ تعالوا عاوزكم فى حاجه كده