أسمعونى بس هقول كلام مهم وشهاده حيه على ما يحدث فى مصر

انا عاوزه اكلم معاكم يا جماعه لانى واحده منكم

ولأنى بنت مصريه

صحيح كنت تافهه

ولا بفكر فى السياسه ولا فى الكلام ده

لأننا أغنياء ومعانا فلوس وكده

وكنا ديما مش بنفكر فى حد

وبالنسبه للرئيس مبارك فقرراته كانت عادى

ديما فى صالح الأغنياء

بس انا عاوزه أقول حاجه

اننا ايضا كنا بنحب مصر

واتربينا على حب مصر


وفى الأيام اللى فاتت شوفنا حاجات كتير

فى منطقتنا وبعد وقوع احداث يوم الجمعه

قالوا ان مفيش شرطه وان كل المراكز اتحرقت

وان فى بلطجيه وعصابات هيهجموا علينا

وفجأه سمعنا صريخ فى الشارع

وضرب نار

وقالوا

جايين

قادمين

هم مين ؟؟؟

الحراميه

وبدأنا كلنا نقول اننا كنا فى نعمه وكان كفايه الأمان

لكن طبعا كل الشباب اللى فى العماره نزلوا يدافعوا عننا

وفجأه وبعد معركه مسكوا البلطجيه

والمفجأه أنهم امن وشرطه وظباط وعصابات من الحزب الوطنى

تخيلوا يا جماعه ؟؟

مش بس كده كمان وقع تحت ايدينا ورق من مكاتب امن الدوله المحروقه وضح انهم كانوا مخططين لكل ده وبقيادة جمال مبارك

مش بس كده

كمان كان فى عربية أسعاف

عاوزه تروع الناس وبتضرب نار

وبعد كده طلع أنهم برضه من الأمن

ومعاهم اسلحه وسكاكين وعصيان ورشاشات ورصاص

وبدأنا نخاف

وشباب العماره مش معاهم أسلحه

كان معانا شاب فى العماره يعرف ناس من اللى فى التحرير

اتصل وقالهم

تخيلوا يا جماعه عملوا أيه ؟؟؟؟؟؟؟

بعتوا عدد كبير منهم

من الشباب اللى فى ميدان التحرير

واتوا لنا وظلوا يسهرون على حمايتنا

هؤلاء الأبطال

اللى بجد ربنا ينصرهم على حسنى مبارك

بجد انا أتغيرت خالص وبقيت أفهم فى السياسه

فى بقى نقطه مهمه عاوزه اكلم فيها

خطاب مبارك اللى قال انه قدم تنازلات وعاوز يعدل الدستور

وسمعت ناس بتقول

بالعقل والحكمه وبلاش انتحار سياسى وفراغ سياسى ولازم بالتدريج وهدنه والكلام ده

عاوزه أقولهم

أن الكلام ده مش صح

ولا حوار مع واحد سرقنا وهددنا

ومبارك لازم يرحل

لأنه بجد خطط ضد امننا

أزاى بعد كده نأمن له

وبعدين ركزوا شويه علشان خاطرى

لو سمعتم الاخبار

هتلاقوا ان لسه فى بلطجيه بيحاولوا يفرقوا الشباب اللى فى الميدان

ويضربوهم

ويعتدوا عليهم

طيب مين دول اللى بيضربوهم وبيحاولا يعتدوا عليهم

تبع مين

تبع مبارك

وتبع الحزب الوطنى

يبقى أزاى عاوز يسيب السلطه

وازاى نأمن له

وفى فاسدين كتير تبعه بيحركوه ويشجعوه على الكلام ده

واللى بيقول مبارك بيحب مصر

مبارك لو بيحب مصر وشاف كل ده هيعرف ان الحل الوحيد هو انه يرحل ولو رحل هتتحل

واللى بقى بيقول هيبقى بقى فى فراغ ومين هيحكمنا

ده أستخفاف بعقلنا وأستهزاء بينا

هو يعنى مصر خلاص مفهاش حاجه ومفهاش رجاله ؟؟

عاوزه بقى اقول حاجه لكل البنات والشباب هنا

احنا هنتابع الاخبار

بس والله التليفزيون المصرى كذاب

وانا اتصلت بيهم قطعوا علينا وشتمونا لما جينا نقول شهادتنا

مش بس احنا وناس تانيه كتيره

وطبعا هحط لسته بالقنوات الكذابه

الاولى

والنيل للاخبار

وكل قنوات النيل

والمحور
والحياه

ودريم

إلا ما رحم ربى

والله كلهم كذابين

وبنحاول نتصل بيهم بيرفضوا يردوا

واللى بيتصلوا كذابين

ومتأجرين

وفى قنوات بتغطى


بصدق

زى بىبى سى

والجزيره

وقناة الحوار

والحره

وكمان مواقع النت

عليها ناس كذابين

وناس مش فاهمه حاجه

حتى الفيس دخله ناس تبع الأمن بيحاولا يشوشوا ويخدعوا وللأسف فى ناس اتخدعت وأنا شوفت ده

لكن شبكه رصد صادقه

والدستور الأصلى

وبوابة الشروق

بيقولوا الحق

وكمان هنا المنتدى

ساحة ملتقى العقول

بخير

وعذارى ربنا يكرمها بتنقل لينا الأخبار

وكلها صحيحه

ولازم نكون كلنا صف واحد

ونقف مع شباب التحرير فى مطالبها المشروعه والمنطقيه

وأولها

ان مبارك لازم يتنحى

ويارب مكونش طولت عليكم