ثروة 25 يناير وعلاقة الإخوان ...شهاده من قلب التحرير يوم 25

كنت أريد ان اكتب شىء بسيط لكم هنا

أولا احب ان أقول انتمائى

انا من جماعة الإخوان المسلمين

وعاوز أقول شهادة حق

واللى عاوز يصدق يصدق

واللى عاوز يكدب يكدب

معظم قيادات الجماعه ومكتب الإرشاد لم يكن يعلم شىء كثير عن يوم 25 يناير

وانا فقط عرفت يوم 24 يناير

لم ننظم شىء ولم نخطط لشىء

وفقط عرفنا مثلنا مثل الشباب الذى عرف من الانترنت

ومن خطط هم شباب يناير

جروب خالد سعيد

والثوره على الفقر والتعذيب والبطاله

وشباب التغيير وغيرهم ومش عاوز أقول أسماء

ولما عرفت ان فى مظاهرات هتخرج

كنت اعتقد انها مظاهرات عاديه زى كل المظاهرات

وبصراحه

دى اول مره مكتب الإرشاد يمتنع عن أن يعطينا موقف معين

كأنهم تركونا نعمل اللى على كيفنا

لكن انا قررت مع مجموعه من زملائى أننا هنخرج وهننزل المظاهرات

انا أعرف دكتور خالد جيدا

وهو بالمناسبه مش إخوان مسلمين

حبيت أتصل بيه وأسأله

لكنى قابلته قبلها

كان واثق من نفسه اوى

أستغربت

لكن حسيت ان فعلا فى توقيت

لكن خالد او معاه مجموعه؟؟

اكيد العدد هيكون مش كبير

فمن نفسى ودون تخطيط للجماعه

حاولت قصارى جهدى حشد اكبر عدد من أصدقائى من الجماعه

وطلعنا من مظاهره من ناهيه  وهى منطقه شعبيه

كانت المظاهره كلها إخوان

وعرفت أن خالد وناس تانيه

هيطلعوا مظاهراتهم من الجامعه وشبرا والمطرانيه

بس سمعت بعدها ان اللى فى الجامعه كلهم اتقبض عليهم

وان المسيره طالعه من دار السلام ومن بولاق

وعرفت ان الشباب غيروا الخطه

وان التجمع هيكون فى التحرير

وطبعا قررنا نروح ليهم

واكلنا ضرب

انا رجلى مكسوره حتى الان

طبعا لأن المظاهره بتاعتنا مظاهره إخوان

أخدنا الحظ الوافر من الضرب والحمد لله

أنضربنا ضرب جامد جدا لم نراه فى أى مظاهره

ومطاردات فى الشوارع الجانبيه

واحنا بننضرب حد نادى بصةت عالى

الحقوا الشباب وصلوا التحرير

100 الف

حسيت انى مش شايف اودامى

لازم أوصل التحرير

مشوفناش الغاز ولا المطاطى

كل اللى شوفته

ان فى صديق لنا مات

شهيد

وهو من أعز أصدقائى

وبعدها غلا الدم فى عروقنا

لم نجد انفسنا إلا ونحن نجرى وعساكر الأمن يفرون امامنا

لا أدرى إن كان القتل الذى أعملوه فينا حولنا الى وحوش ام ماذا

كل الذى اعرفه اننا وصلنا لميدان التحرير

كنا فى الطريق له 1000 وصلنا 300

و700 بين قتيل وجريح ومعتقل

وصلت للتحرير

وهناك بالمناسبه قابلت خالد

كنا يوم 25 عدد كبير

وكان لينا هتاف واحد

الشعب يريد إسقاط النظام

لاحظنا ان الميدان ملىء بالقاذروات

والشارع ملىء بالأوراق

وهذه عادة حالة الميادين المصريه للأسف

بدأت مجموعه من الفتيات وكلهن من حركة 6 أبيل للامانه .كانوا بينظفوا الميدان

اتعلمت درس جديد

وهو ان ممكان واحده تكون متبرجه وغير محجبه

لكن ممكن تكون شخصيتها نظيفه

وتحتاج من يرشدها

كله كان ينظف ويجمل فى الميدان

حسيت اننا حررنا الميدان وان الميدان بقى بتاعنا

وبدأ شباب العداله والحريه وحزب الجبهه يلحنون على العود وينشدون اغانى

ووجدت من يلقون الشعر

ومجموعه اخرى تقول الدعاء وتقرأ القران

ومجموعه من المنتقبات فى جانب يتحدثن

وامامهم فتيات مسيحيات يتشاورن

لم نسمع بفتنه

لم نسمع بتحرش

لم نسمع بسرقه

العدد يزيد

لنا مطلب أسمعونا

مطلبنا كان إسقاط النظام الفاشل الذى أضاع بلادنا

نعم الإخوان كانوا موجودين والسبب هو ان مصر كلها خرجت والإخوان هم جزء من مصر

نعم كان هناك من يخرج من الإخوان ليخطب فى الناس

وجل من يسنعه إخوان

وهناك من هو ناصرى او ليبرالى يخطب وجل من يسمعه هو مثله

لكن صديقى خالد كان يمارسه هوايته فى الحديث بصوت عالى وكان من يسمعه من كافة التيارات

ضحكت لأنى وجدت من أستطاع ان يتكلم بطريقه غريبه يستطيع تجميع الناس حوله
اللى يسارى واقف ومفكره يسارى
والإخوانى واقف مفكره إخوانى
واللى غد واقف مفكره غد

سألت خالد سؤال

قولتله هيفرقونا

قالى لالالالالالالالا

مستحيل

عرفت انه طيب

وخبرته قليله

عارفين ليه

هو كان مفكر علشان عددنا 100 الف هيخافوا يضربونا يحصل جرحى وقتلى

لكن بما انى خبره فى الحاجات دى

وانضربت كتير

كنت عارف ان حسنى مبارك ممكن يضحى بمصر كلها علشان الكرسى

وجات اللحظه الموعوده

فى 3 شباب ماتوا على ايدى

رصاص مطاطى

اول مره فى حياتى أبكى

كان يسير بجانبى شاب

وجاءت له رصاصه فى عينه ففقدها

فوقفت

لم أجرى

لانى رأيت من ضربه

وهو ظابط

ليس عسكرى جاهل

ظابط

وقفت

وذهبت ناحته

وامسكت به

ولم أدرى ما هو الحال بسبب ضرب شديد بالهروات بمن يحيط به

لا أحكى هذا حتى أكسب تعاطف

او حتى أفتخر ولكن

حتى تفهمون لماذا لن نترك التحرير

لماذا نريد الثأر من مبارك

مش عاوزين حد يساعدنا

بس والنبى بلاش الكلام بتاع الكنتاكى وأننا بنقبض من ايران وقناة الجزيره بتحركنا والكلام الفارغ ده

بجد الكلام ده بيوجع اوى

اوى

عاوز بس أقول حاجه

لأنى قرأت الكلام بتاع خالد

احنا دكاتره ومستريحيين

وانا غنى

وخالد هو الولد الوحيد

إحنا مش فاضيين ولا عاطلين ولا مخربين

إحنا مستفيدين من الوضع الحالى

مطلعناش علشان 15 % زياده فى المرتبات

أحنا طلعنا علشان الحريه

علشان عاوزين بلدنا تبقى أفضل

علشان أبنى وابنك يطلع حر

لا يمكن نقبل بملك يحكمنا

حتى لو أكلنا كل يوم لحوم ولبسنا حرير وذهب

لا

ناكل فول وطعميه بس نكون أحرار

هذا هو هدفنا

وكل واحد بيقول أرجعوا بقى

وبيتهنا بالتخريب

عاوز أقوله

كلنا خرجنا يوم 25 نبغى حريه

من أردا شىء أخر وتحقق فليرجع

اما من كان يبغى الحريه

الحريه لم تتحقق بعد فلماذا نرجع

ما فعلناه كانت ثوره

لا نريد ان يخدعنا النظام القاتل ويدخلنا فى حسابات ميكانيكيه لا نفهمها

لان الثوره تلغى ما قبلها من دستور وما قبلها من مجالس

فحسنى مبارك باطل وحكومته باطله ونائبه باطل

ولا نعترف بهم

ولا نعترف بأى من أذيال النظام

لانه ببساطه اطلق علينا الرصاص

لانه ببساطه قتلنا

واوافق على مبارك رئيس بشرط

وهو ان يتركنا نقتل اولاده واحفاده واخواته كما قتل اولادنا وأخوتنا


وعاوز أقول كله اخيره

الفزاعه بتاعت الإخوان

كل حاجه يقولك الإخوان عاوزين يطلعوا على السلطه وهيطلعوا على اكتافكم

احنا مطلعناش على كتف حد

أولا احنا ناس لينا رساله وهدف وبنحترم كل الناس

ياما أعتقلنا وياما أنضربنا

طول عمرنا بنطلع فى مظاهرات علشان الشعب والشعب مش بيساندنا

النهارده الشعب كله طلع فى مظاهره فلازم نسانده

وشكرا