ثورة 25 يناير ...ميدان التحرير ...تاريخ صنعه شعب ..

من داخل ميدان التحرير

أو

من خارجه

من شرفة منزلك شاهدت

أو

عبر شاشة التلفاز

.............................

يوم 25 شرارة البدايه

أو

جمعة الغضب

أو

جمعة الرحيل

أو

أسبوع الصمود

أو

يوم النصر

....................................

هل رأيت ؟؟

هل شاهدت ؟؟

موقف معين

أو

حدث

أكتب لنا

واحكى

موقف سياسى

أو أجتماعى

او

ثقافى

من قلب الثوره

لنؤرخ جميعا ثورتنا

بأقلامنا

أنتظر حوارتكم ومشاركتكم

أنا هبدأ وأحكى موقف بجد رائع

يوم 25 يناير كنت فى ميدان التحرير وكنا تقريبا بعد العصر

شوفت بالصدفه خالد (مديركم ) هناك هههههههههههههه

طبعا حاولت أنادى عليه بس مأخدش باله مع ان هو اللى قالى على المعاد والمكان

كان معاه واحد صديق لينا أسمه أمير من دمياط

أمير حسن

وكانوا هم الاتنين ماشيين سوا

بالمناسبه أمير ليس له علاقه بالسياسه وليس له أنتماء معين بس انا قولت طالما أمير نزل يبقى الموضوع كبير

كان العدد حوالى عشر الاف او أقل

أنا دخلت الميدان بصعوبه

كان فى كردون أمنى كبير

من عساكر الأمن المركزى ومدججين بالسلاح

وكانوا عمالين يزيدوا

وقدامهم واحد من الظباط عامل فيها باشا اوى وعمال يزود عدد العساكر ومن خبرتى فى المظاهرات عرفت ان عمنا الظابط ده من الذين لا يرحمون ههههههههههههههههههههههههههههههه

وبعدها لقيت أمير جلس كده على سور حديدى فى أخر الميدان بتاع كشك شرطه وكأنه عاوز يستريح

فلقيت الظابط شاور كده من بعيد لعسكرى وكان طبعا لسه الظباط فيه داء الأنزحه الكدابه
راح العسكرى هو واتنين مخبرين قالوا لأمير انزل من هنا

طبعا امير ركب دماغه وقال مش نازل أنت مالك للراجل اللى لابس مدنى وميعرفش انه شرطه سريه
قام الراجل كلمه وحش وقاله أنزل أحسن لك
هنا بقى خالد بدأ يتكلم وكالعاده بصوت عالى وأستفزاز لبتوع الرطه السريه هو أمير

روحت بسرعه ألحق المجانيين دول لأنهم هيضيعوا نفسهم على حاجه متستاهلش حاكم الواحد يتمسك فى حاجه تستاهل وإلا بلاش هههههههههههههههه بس ملحقتش لأن خالد كان صوته عالى واتلم حواليه ناس كتير من المتظاهرين يشوفوا ايه الحكايه كنت بس سامع صوته

وطبعا الظابط الجبان أمر صفين عساكر أنهم يحاوطوهم لانه جبان وخايف من واحد اعزل

بس بجد حصلت حاجه غريبه أوى

لقيت خالد مش بيشتم فى الحكومه ولا فى الظابط ولا فى العساكر لقيته بيقول وبصوت عالى

فوقوا ...أفهموا يا عساكر ...أنتم جايين تحوطونا ليه ....خايفين من أيه ؟؟
انتم مش فاهمين \
بكره هتفهموا
انا طالع علشانكم
علشان مرتبك الصغير
وعلشان الميه اللى مش نضيفه اللى جابت لأمك فشل كلوى
وعلشان المبيدات المسرطنه اللى قتلت أخوك
علشان تعيشوا عيشه كريمه
وعلشان تتعاملوا معامله كريمه

إحنا طالعين علشان الشعب وعلشان الناس الغلابا
وعلشان امك واختك
علشان مصلحتكم

وتقريبا دخل وسط العساكر وبدأ يمسك أيديهم ويكلم معاهم

فجأه لقيت الظابط اعطى امر

أرجع أرجع

للعساكر

فض الكردون

وبعدهم بعيد

العساكر وهو ماشيين راجعين

والله كانوا بيبصوا وراهم عاوزين يسمعوا بقية الكلام كأنهم فهموا وعاوزين يسمعوا بس خايفيين

الظابط فض الكردون مخصوص وضحى بمساحه كبيره اتسعت فيها المظاهره لأنه خاف من الصوت ومن الكلام

الموقف ده أثر فيا اوى
حسيت أننا نقدر بفكرتنا وبكلامنا نعمل كتير وحسيت ساعتها ان الثوره هتنجح

وحسيت ان خالد هيروح فى داهيه لان كل اللى الظابط عمله أنه حفظ شكله
وقولت لو الثوره دى منجحتش مش هشوفك تانى يا أبو خالد وهضيع معاك الواد امير الغلبان ههههههههههههه

بس الحمد لله نجحت
هههههههههههههههههه

من طرف **dandana ali** السبت 19 فبراير 2011, 12:54 am

هههههههههههههههههههههههههههههه
ضحكتنى والله يا استاذ الطائر المهاجر

أنا بصراحة ماليش مواقف داخل الميدان لأنى بعييدة عن القاهرة

بس افتكرت حاجة ليا واحدة صحبتى جداااااا
يارب ماتشوفش كلامى لحسن تضربنى ههههههههه
المهم أنا بعترف انى كنت واحدة من اللى اتخدعوا فى خطاب الرئيس بس تصدقوا ان تانى يوم الظهر كده كان راح مفعوله وطبعا لما حدثت موقعة الجمل جاتلى صدمة ماكنتش عارفة اكلم او اعبر عن اى حاجة من كتر الوحشية بس قررت ساعتها انى اسممممممع كتييير عشان ابقى متحملة مسئولية كلامى
كنت مصدقة انها بالفعل ثورة بيضاء وده من البداية بس كنت عايزة اتأكد بالفعل الرئيس واللى معاه اللى عملوا كل الاحداث المريرة دى وان ممكن حد عشان السلطة يعمل كل ده موضوع مش سهل عليا خاصة انى دخلت فى جو السياسة وانى اناقش واتكلم بصوت عالى هنا من كام شهر ههههههههه

بس عشان ماطولش
انا بعدها طبعا قلت لأ لازم يكملوا وده بعد مازال مفعول الخطاب الرائع لأنى عرفت ان دى لعبة
ساعتها كلمت صحبتى بسأل عنها وكان بليل وقعدنا نتناقش وهى كانت مقتنعة ان مش معقولة اللى بيعملوه فى التحرير
وان لازم يمشوا وان ازاى عازينه يمشى وانهم نسيوا تاريخه انا قلت الكلمة دى ههههههه بعد خطابه لما كلمتها برضو
بس عرفت ان العبرة بالنهاية
والموضوع ده فادنى بأنى بقيت عارفة اللى قدامى بيفكر ازاى لأنى فكرت زيه قبل كده حتى لو كان لمده قليلة بس بقيت اكتر معرفة فى الردههههههههه

بس وصلت لدرجة انها حتى زعقتلى فى التليفون وانا بقى بتجن لما حد يعلى صوته عليا ههههههههههه
روحت رديت عليها وكنت طبعا بحاول اوطى صوتى والحمدلله صوتى اساسا نبرته منخفضة بس كنت منفعلة لدرجة ان ماما جاتلى قالتى اهدى

المشكلة انها كانت بانية كل ارائها مش نتيجة انها سمعت اراء كتيرة من ناس موثوقة وسياسين معروفين نتيجة لأراء اللى عندها فى البيت
وده يمكن لأنها كانت مشغولة
وده فادنى لأنى بقيت ارد عليها خاصة فى نقطة الدستور لأنى كنت سمعت لأكتر من حد وانا طلعت بفكرة
المهم انى فى الآخر لما لقيتها انفعلت وقالت كلام على بتوع التحرير وهى كانت مصدقاه قووووى وحتى لما سمعت رأيى ماقتنعتش
قلتلها خلاااص مش سياسية اللى حتفرقنا انتى حرة ههههههههههه
بس كنت مخنوقة بعدها
لأنى ماكنتش مقتنعه ان حتى اللى يقول ان مبارك مايتنحاش انه يصدق الكلام عن التحرير

يعنى اللى عايزة اقوله من الآخر

أنى اتعلمت ان الواحد لازم مايخدش قرار او يتبع مبدأ غير لما يسمع هو بنفسه
ويستفيد من اكتر من حد وياخد هو اللى عايزة بفكرته

مش اسمع من شخص واحد واقول امييييين
لازم افكر واعرف لأنى كلمتى ممكن تأثر فى انسان وارجع اندم عليها
واتحاسب عليها بعد كده قدام ربنا

مش عارفة انا طولت بجد سووورى
بس جه فى بالى الموقف ده
والحمدلله ان الثورة نجحت يا استاذ الطائر
هههههههههههه

من طرف **سجده** السبت 19 فبراير 2011, 5:38 pm

الأول برحب بالطائر المهاجر في المنتدي

وبهنيه علي موضوعه المميز

وفعلا كلنا محتاجين نشارك لان ميدان التحرير علم العالم كله مش مصر بس

الموقف اللي حضرتك ذكرته موقف رائع ومش جديد طبعا علي مديرنا
وكلام حضرتك مهم جدا

وبالنسبه لدندنه هيا فعلا كانت متضايقه من رد فعل صديقتها هههههههههههه بس دافعت عن الي هيا مقتنعه بيه وعملت اللي عليها ههههههههههههه

والمواقف كتيره والدروس اكتر من ثورتنا الشريفه

بس في موقف ذكرته واحده صاحبتي اخوها كان في الميدان ووالدها كلمه

بيطمن عليه

بكي وقاله يا بابا انا مرتاح

انا عمري ماحسيت الراحه زي النهارده

وعمري ما حسيت حب مصر وشعبها زي النهارده

احنا كلنا هنا بنحب بعض جدا عايش مع اخواتي بنخاف علي بعض ومش عاوزين نرجع

انا خلاص لقيت الراحه
كل المعادن ظهرت وكل القلوب اتوحدت والأصل المصري الكريم طهر ووحد قلوب الشباب
وحسوا فعلا بحب مصر
حسوا بالترابط وانهم كلهم اخوات واسره واحده ومصر الأم والاب

ياريت منتفرقش تاني ونكبر حبنا لبلدنا ولبعض
ولا للفرقه ونعم للوحده

في انتظار باقي الأعضاء

من طرف **عذاري** السبت 19 فبراير 2011, 6:41 pm

هلا والله

بطائر المهاجر

منور المنتدى

تعرف اني مو مصريه فما عندي شي اقوله

موقف خالد اتوقع اي شي منه

ههههههههههههههههههههههه

وانتم عارفينه اكثر مني

دندونه هدي اعصابك مره ثانيه قلت ماتعبرين غير لما تهدين

ههههههههههههههههههههه

سجوده فعلا موقف ما يحتاج حد يوصفه موقف مؤثر

مشكووووووووووووور موضوع راااااااااائع

ان شاءالله يدخلون باقي الاعضاء او الزوار يقولون لنا المواقف الي صارت معهم

ومنهم د- خالد ورطتك ما ابي عذر

ههههههههههههههههههههههههه

جزاك الله خيرا

من طرف **k_I_A_S_B** السبت 19 فبراير 2011, 6:57 pm

والله كنت شاكك اول لما قال طائر مهاجر

يابنى خف شويه هههههههههههههههههه

ليس كل ما يقال فى الخاص يقال فى العام

طيب انا هبقى أحكى بس والله لاحكى عنك موقف وانت عارف ....هضيعك هههههههههههههههه

(موقف طبى ) ههههههههههههه

يا جماعه الطائر المهاجر هو اخى الأكبر وهو طبيب متميز جدا وإنسان وطنى جدا بجد من اعز أصدقائى وبتعلم منه ديما ووجوده معنا شرف عظيم لى شخصيا

من طرف ???? السبت 19 فبراير 2011, 10:36 pm

على فكره انا من اللى شاركوا فى المظاهرات

بس شاركت 3 أيام بس

لان فى اليوم التالت فقدت عينى الشمالى

فى واحد من القناصين ضربنى برصاصه فى عينى وأستقرت فى قاع العين

انا مش ندمان ولا زعلان

ولا عاوز تعويض

أقولكم على حاجه

أنا مستعد بكره أنزل تانى وأفقد عينى التانيه

أنا فقدت عينى لأنى بحب بلدى ومستعد أضحى علشانها

وانا ماليش فى السياسه ولا من الإخوان ولا من الأحزاب

بس كنت كنت عاوز بس الناس اللى بتتكلم والناس اللى بتحاول تقفز على الثوره تتقى الله

نريد القصاص العادل من حسنى مبارك

ونريد محاسبة من أطلق الرصاص

ونريد للثوره ان تكتمل وأنا يحكم مصر فقط من يريده شعب مصر

كنت عاوز أقول حاجه أخيره

على فكره انا مسيحى

وبحب مصر

وشكرا

من طرف monmona الأحد 20 فبراير 2011, 12:53 am

أنا أطالب بتثبيت الموضوع لأته بجد هيكون بمثابة ملف مشرف عن مواقف حقيقية عن الثورة والثوار #### وبصراحه نفسى ولادنا يقروا الكلام ده ولو بعد مية سنة ويكون لساحة ملتقى العقول دور فى تدوين التاريخ بأيدى صانعيه

من طرف الشروق الأحد 20 فبراير 2011, 5:09 pm

انا بقى عندى موقف حلو اوى شوفته فى ميدان التحرير وعاوزه احكيه

وهو ان كان فى شباب بينظفوا الشارع وكمان كان فى بنات وكان العدد كبير أوى وكان فى زحمه وكان الشباب بيحافظوا على البنات وكان فى طريقه متحضره جدا فى التعامل وبجد شوفنا مصر اللى فيها تسامح وحب بين كل الناس

مصر اللى مفهاش تعصب

مصر اللى لكل الناس

مصر اللى بتحترم كل شخص وفكرته

مصر اللى بوفر لكل واحد حرية الفكره والعقيده

كان فى ناس كتير بأفكار كتير
لكن كلهم بقى اتفقوا على حاجه واحده بس وهى حب مصر وعلشان كده انتصروا وحدش قدر عليهم لان كلهم حبوا البلد دى وكلهم كانوا وطنيين بجد

وفى الوقت اللى كنت فيه بشوف المشهد ده سمعنا كده ان فى كلام بتردده دلوه عربيه بنحترمها بتقول ان إيران هى اللى بتحرك المظاهرات وسمعت ساعتها التحرير كله بيهتف ضد ايران وبيقول تحيا مصر

شباب واعى ومثقف ومحدش حره ولا أصابع خارجيه ولا اجندات خارجيه زى لما البعض قال

وعلشان كده ربنا نصرهم

وديما فى نصر وعزه ووحده إن شاء الله

من طرف فاروق المصرى الخميس 24 فبراير 2011, 3:51 am

فين الموضوع ده دنا عندى مليون موقف هجى كل شويه وأحكى ليكم

فى موقف لذيذ اوى حصل يوم موقعة الجمل وطبعا دا اليوم اللى طلقوا فيه الجمال والخيل على ميدان التحريرر وكانوا عاوزين يفكوا الأعتصام

فى اليوم ده قابلت راجل كده شكله محترم اوى وملامحه اجنبيه ...فأستغربت ورحت أتعرف عليه لحسن يكون مندسين ههههههههههههههه فطلع مصرى أبن مصريين بس ذنبه بقى أن شعره أصفر وعينيه خضرا وطلع مهندس زى حالاتى وعنده شركه كبيره وفضلنا نكلم فى الهندسه والمعمار وكده بس كان فيه عيب كبير وهو انه من الناس اللى محبكاها هههههههههههههه
يعنى واحنا واقفين طلع منديل ومسح أيده كذا مره ....موسوس وبيقرف بسرعه ...هههههههههههه وكل شويه ينضف بنطلونه ويمسح الجزمه بطريقه مبالغ فيها ههههههههههههه

فسألته قولتله البنطلون نضيف انت بتنفضه ليه ....قالى لالالالالالا دا اتوسخ خالص شكله معفن أنا خزيان منه هههههههههههههه مع ان البنطلون كان نضيف جدا يدوبك شوية تراب صغيرين خالص ههههههههههه

المهم واحده جات بتوزع بسكويت لان الناس كانت جعانه وهو طبعا رفض ياخد هههههههههههه كان قرفان جدا هههههههه
المخم يعنى قولت لما أخلع بقى من الراجل اللى محسوك ده وأشوف حد تانى أقف معاه

وفجأه سمعنا ان فى جمال داخله وخيل

وفعلا كنا فى الوش وفوجئنا ان الدنيا اتقسمت نصفين وفى ناس معاها عصيان وراكبه على خيل ونازله ضرب فينا
جريت بسرعه ونطيت من على الإطار الحديدى

كنت متغاظ جدا جدا

حاجه تخنق

وفجأه فى واحد وهو بيجرى أتكعبل ووقع وأصطاده واحد من بتوع الخيل ونزل فيه ضرب بعصايه كانت معاه
جريت بسرعه وكنت متغاظ جدا بس ملحقتش الحصان لأنه طلع يجرى

بس فوجئت بأن الراجل اللى كان جنبى طار زى الوحش والله لا انسى هذا المنظر بجد وحش بيجرى بسرعه شديده جدا
ومش بس كده طار فى الهوا زى سوبر مان وطار على الحصان ومسك الراجل اللى على الحصان ووقعه على الأرض بجد المنظر ده كان عاوز يتصور

معرفش عمل كده ازاى ونزل فيه ضرب
وجره على الأرض لحد عندنا ونزلنا كلنا فيه ضرب

لحد لما اعترف وقال أن فى ظابط كبير فى أمن الدوله قاله خد 50 جنيه واعمل كده
وسلمناه للجيش

وبعدها لقيت الراجل ده واقف جنى وبدلته اللى كان عمال يلمع فيها بقيت كلها تراب وطينه هههههههههههههههههههههه
قولتله على فكره البنطلون اتوسخ هتعمل ايه دلوقتى ؟؟؟

قال يا أخى بلاش وسوسه دول شوية تارب صغيرين وسابنى ومشى هههههههههههههههههههههههههههههههههههههههه

ثورة 25 يناير ...ميدان التحرير ...تاريخ صنعه شعب ..

ثورة 25 يناير ...ميدان التحرير ...تاريخ صنعه شعب ..

رد: ثورة 25 يناير ...ميدان التحرير ...تاريخ صنعه شعب ..

رد: ثورة 25 يناير ...ميدان التحرير ...تاريخ صنعه شعب ..

رد: ثورة 25 يناير ...ميدان التحرير ...تاريخ صنعه شعب ..

رد: ثورة 25 يناير ...ميدان التحرير ...تاريخ صنعه شعب ..

رد: ثورة 25 يناير ...ميدان التحرير ...تاريخ صنعه شعب ..

رد: ثورة 25 يناير ...ميدان التحرير ...تاريخ صنعه شعب ..

رد: ثورة 25 يناير ...ميدان التحرير ...تاريخ صنعه شعب ..

رد: ثورة 25 يناير ...ميدان التحرير ...تاريخ صنعه شعب ..

رد: ثورة 25 يناير ...ميدان التحرير ...تاريخ صنعه شعب ..