مناظرة اليوم بين معارض ومؤيد لحكومة شفيق(قمة الرقى حدث فى جروب عشقوا مصر)

انا يا سيدتى الفاضلة طرف المناظرة والذى اشرتى الية مع وانا عضو معاكم هنا بالمنتدى وكمان بالجروب لان اسلوبكم شيق وممتع رغم اختلاف الاراء وكان لى نقاش سابق ممتع مع الدكتورة سجدة قبل رحيل مبارك بالرغم من اعتراضها على استشهادى بالشيوخ الافاضل من الجانب السلفى وانا شاكر لكم جداً لانكم ساعدتم فى شغل فراغى باحاديث جادة وهادفة خصوصاً اننى فى اجازة منذ شهر ومن المنتظر ان تستمر لمدة شهر آخر حيث انى اعمل مساعد مدير ادارة باحد الفنادق الهامة والكبرى بالغردقة وان شاء المولى عز وجل سيستمر النقاش غداً فشكراً لكى غلى المجهود الرائع وعلى حسن استماعك عفواً مشاهدتك

كويس يعنى ظنى طلع فى محله ههههههه أنك عضو جديد بالفعل
ومرحب بحضرتك معنا

وكويس أننا أشغلنا فراغ حضرتك فى شىء هادف وده يسعدنا

وأنا كنت مستمتعة جدااا لأستماعى أقصد بمشاهدتى ههههه لأبناء بلدى وهم بيتنقاشوا بطريقة محترمة

ومنتظرة بقية النقاش بأذن الله

جزاكم الله خيرا

ممكن اشارك فى الحوار ........اكيد ممكن

انا اقول انى مع بقاء الفريق احمد شفيق
لانه اولا رجل محترم وعقلانى وبيتكلم بالعقل والمنطق
ثانيا عاجبنى جدا مصدقيته بمعنى بيقول فعلا اللى حيقدر يعمله واللى مش هيقدر يعمله بيقول مش هقدر يعنى مش بيعملنا البحر طحينه ويضحك علينا وخلاص

ثالثا هو احنا لو بصينا لشركة مصر للطيران هنلاقى نموذج مشرف ناتج عن مجهوداته بالتاكيد

رابعا ان الوزارة دى كدة كدة مؤقتة يعنى نسيبها تقوم بدورها لان هى اصلا وقتها قليل مش معقول هنضيع الوقت ده كمان فى اننا نفضل نغير الوزارة والوزراء وعلى ما كل واحد يفهم دوره كويس برده مش هيلحق يعمل حاجة وانا شايفة اننا محتاجين ان الامور تمشى مش تقف اكتر من كدة


خامسا مش من المنطق اطلاقا ان احمد شفيق عشان من زمن مبارك ولا اللى عينه مبارك انه بقى جرثومة لابد التخلص منها
طيب ماهو كل المسئولين والعاملين من ايام مبارك ..............نرميهم بقى

طيب ما احنا موجودين من ايام مبارك ندفن سنا ولا نولع فيها

هتقولولى لا تفرق هو حلف اليمين ادام مبارك.............. طب وماله يحلفه ادام مبارك ......ادام اوباما......ادام المرايه
هو اليمين اللى حلفه حلفه بالله ولا بمبارك



سادسا مفيش شخص هيتفق عليه ال85 مليون فلو كل واحد هيجى هيخرج الشوية اللى معارضينه يطالبوا برحيله يبقى بقت فوضى بقى ومش هنخلص


سابعا المفروض اننا نسيبهم يشتغلوا عشان البلد للاسف بقت فوضى ووجود المظاهرات دلوقتى بقى ضد البلد على عكس الاول كان فى صالحها
بقى كل من هب ودب بيتظاهر وخلاص بقى تقليد اعمى والله




ثامنا انا شايفة ان شفيق فيه كتير مؤيدين ليه زى ما فيه معارضين فانا شايفة بصراحة ان اللى كل شوية يعتصموا عشان يرحل كدة بيفرضوا رايهم لان مش كل راى بقى ليهم هو اللى يمشى والباقى مش مهم رايهم ا........... طبعا هتقولولى مهم بيعبروا عن رايهم عبروا انتوا كمان
هقولكم طبعا مؤيدين شفيق مبيعترضوش ولا بيعتصموا عشان ميحصلش انقسام تانى ونرجع بقى نقول مؤيد ومعارض ومشاكل فيا ريت المعارضين كمان يقدروا ده وميحولوش يفرضوا رايهم بالقوة على كل المصريين خلاص رسالتكم وصلت لكن مش كل راى ليكم لازم يمشى راعوا ان البلد بتاعتنا كلنا مش بتاعت شوية والباقى ملهومش فيها

انا اقول انى مع بقاء الفريق احمد شفيق
لانه اولا رجل محترم وعقلانى وبيتكلم بالعقل والمنطق

[b]إذن فليعمل معلم منطق وليس رئيس وزراء لأن هذه ليست مواصفات رئيس الوزراء ولكن مواصفات مدرس المنطق...




ثانيا عاجبنى جدا مصدقيته بمعنى بيقول فعلا اللى حيقدر يعمله واللى مش هيقدر يعمله بيقول مش هقدر يعنى مش بيعملنا البحر طحينه ويضحك علينا وخلاص

كلامك غلط يا نوسه ...لأنه كل كلامه كذب وبيغيره ومش بيعمل حاجه منه وعندك مثلا كلامه قبل تنجى مبارك لما قال لا يمكن مبارك يتنحى وهذه ليست ثوره وأنا ضد هذا المنطق ورجع بعد التنحى قال ...لألألألأ دى ثوره وكان لازم مبارك يمشى ....ثانيا اول لما مسك رئيس وزراء قال هنعطى فرصه للحريات والتظاهر السلمى وتانى يوم أطلقت الجمال والخيل على الناس فى ميدان التحرير ....يبقى هو مش بيعمل البحر طحينه دا كله طحينه أصلا


ثالثا هو احنا لو بصينا لشركة مصر للطيران هنلاقى نموذج مشرف ناتج عن مجهوداته بالتاكيد

[b]كلامك غلط ...انا عاوز اعرف انتى بصيتى لمصر للطيران من أى أتجاه ؟؟؟ أرجعى حضرتك لحاجات موثقه ..مص للطيران فى عهده كانت المركز التاسع ضمن أسوأ عشر شركات طيران فى العالم وده أنا شوفته على موقع أمريكى شهير لتصنيف أفضل شركات العالم وكل الناس اللى متابعه عارفاه ...اما منطق ان شفيق وزير شاطر وفى عهده مصر للطيران اتقدمت فهو نفس المنطق اللى كان بيتقال بيه أن نظيف رئيس وزراء شاطر وان العادلى وزير محترم ورشيد نزيه وهم التلاته دلوقتى فى السجن بتهمة السرقه والقتل !!!!!!


رابعا ان الوزارة دى كدة كدة مؤقتة يعنى نسيبها تقوم بدورها لان هى اصلا وقتها قليل مش معقول هنضيع الوقت ده كمان فى اننا نفضل نغير الوزارة والوزراء وعلى ما كل واحد يفهم دوره كويس برده مش هيلحق يعمل حاجة وانا شايفة اننا محتاجين ان الامور تمشى مش تقف اكتر من كدة


[b]والامور واقفه ليه ؟؟؟ بسبب بقاء هذه الوزاره ثم ان هذه الفتره من أخطر الفترات فى تاريخ مصر ....مفيش حاجه أسمها نسيبها علشان فتره مؤقته ..مصر اكبر من كده بكتير ...

[b]خامسا مش من المنطق اطلاقا ان احمد شفيق عشان من زمن مبارك ولا اللى عينه مبارك انه بقى جرثومة لابد التخلص منها
طيب ماهو كل المسئولين والعاملين من ايام مبارك ..............نرميهم بقى

[b]طيب ما احنا موجودين من ايام مبارك ندفن سنا ولا نولع فيها

[b]كلامك غلط ....طيب مكل الناس كانت موجوده أيام مبارك حتى الرئيس اللى هيمسك الجديد ...الفكره مش انك تكونى موجوده من أيام مبارك الفكره هى انك تكونى فعلا عضوه مؤسسه فى الحزب الوطنى وبتبنى أفكاره فى الحاله دى مش معناها أنى أجلدك لكن المخطىء فى الفتره الماضيه واللى سرق البلد يتم حسابه سواء من الحزب الوطنى او غيره لكن أعضاء الحجوب الوطنى واللى كانوا بيتبنوا أفكاره يركنوا على جنب لان الحزب ده أثبت فشله بما لا يدع مجالا للشك وشفيق كان رئيس وزراء أختاره مبارك من أجل مهمه محدده وهى فض التجمع وإنهاء الثوره اللى هو كان بيقول عليها حركه .....وهو بنفسه قال كده والكلام مسجل



هتقولولى لا تفرق هو حلف اليمين ادام مبارك.............. طب وماله يحلفه ادام مبارك ......ادام اوباما......ادام المرايه
هو اليمين اللى حلفه حلفه بالله ولا بمبارك

[b]
[b]لا مش كده طبعا ...الموضوع مش موضوع حلفان وعلى رأى المثل قالوا للحرامى أحلف ...العبره بالأفعال ...وأفعال شفيق واضحه وأخرها منع برنامج عمرو الليثى وفضيحته مع محمود سعد وإحنا نزلنا مستندات فى الجروب بتدل على ان شفيق طلع كداب أبقى تابعى معانا




[b]سادسا مفيش شخص هيتفق عليه ال85 مليون فلو كل واحد هيجى هيخرج الشوية اللى معارضينه يطالبوا برحيله يبقى بقت فوضى بقى ومش هنخلص

[b] [b]لا ...رأى الأغلبيه نأخذ به فى من سنختلف معهم اما من هو كان ضد الثوره أصلا وحاول إجهاضها فلا مجال للتصويت عليه أصلا
ثم اننا نختار أفكار ومشاريع وليس أشخاص ..عفوا زمن الأشخاص انتهى مع انتهاء زمن القاتل مبارك


سابعا المفروض اننا نسيبهم يشتغلوا عشان البلد للاسف بقت فوضى ووجود المظاهرات دلوقتى بقى ضد البلد على عكس الاول كان فى صالحها
بقى كل من هب ودب بيتظاهر وخلاص بقى تقليد اعمى والله

[b] [b]لا تخلطى الأوراق ...من يتظاهر ويطالب بسقوط شفيق وحكومة الوطنى وبقاياه الفاسده يتظاهر أيام الجمعه ولا يعطل شىء بل يعبر عن رأيه بطريقه حضاريه ...اما المظاهرات الفئويه التى تعطل العمل يقوم بها فئات غير واعيه ونحن ضدها ولعلمك من يحركها هم بقايا الحزب الوطنى ويدعهمها شفيق ورفاقه يبقى مين بقى بيعطل الدنيا ؟؟؟


[b]
[b]ثامنا انا شايفة ان شفيق فيه كتير مؤيدين ليه زى ما فيه معارضين فانا شايفة بصراحة ان اللى كل شوية يعتصموا عشان يرحل كدة بيفرضوا رايهم لان مش كل راى بقى ليهم هو اللى يمشى والباقى مش مهم رايهم ا........... طبعا هتقولولى مهم بيعبروا عن رايهم عبروا انتوا كمان
هقولكم طبعا مؤيدين شفيق مبيعترضوش ولا بيعتصموا عشان ميحصلش انقسام تانى ونرجع بقى نقول مؤيد ومعارض ومشاكل فيا ريت المعارضين كمان يقدروا ده وميحولوش يفرضوا رايهم بالقوة على كل المصريين خلاص رسالتكم وصلت لكن مش كل راى ليكم لازم يمشى راعوا ان البلد بتاعتنا كلنا مش بتاعت شوية والباقى ملهومش فيها



لالالا يا نوسه انتى لو بتابعى معانا فى المنتدى شوفى أول مقال أنا كتبته بطالب فيه برحيل شفيق وشوفى أول شوية ردود عليه هتلاقى كميه بلطجه سياسيه رهيبه ....دا له رجاله وفريق جامد جدا على اليوم السابع وعل ىالفيس بوك وفى كل مكان .....يا شيخه دول عملوله صفحه وكلها بأكونتات وهميه ....طيب تعالى ننزل ميدان التحرير لما كنت هناك اخر مره وجدت واحد بيقولى يلا ننتخب شفيق قولتله ننتخبه فى ايه حضرتك ؟؟؟ كمل كلامه من غير ميرد عليا كالعاده ....رديت عليه وتناقشت معاه ...اول لما لقى الموضوع قلب حوار ...خلع منى ...وراح على واحد تانى وبيكرر نفس الكلام وهو مش فاهم حاجه أصلا ...وواضح انه مستأجر علشان يقول كده ....ومين اللى طلع ضرب الناس وكسر اللافتات اللى مكتوب عليها شفيق يرحل !!!!

لأ طبعا شفيق له رجاله بتدافع عنه بس مشكلته ان الناس دى مش عاوزه تفهم انهم بيلعبوا بنفس الخطه وكلامهم مش بيتغير وعامة إحنا بنرد على الناس بس اللى بتتناقش وعاوزه تستفبد زيكم وبنوضح اما الاخرين اللى بييجوا يهتفوا يحيا شفيق وخلاص فهم معروفين ولن نرد عليهم لأن ببساطه الثوره بدأت ولن تقف

ومبارك هيتحاكم وشفيق هيحصله ....وأى واحد عشمان فى حاجه تانيه يدور على خطه تانيه لأنهم لعبوا الأول على موضوع جمعة الوفاء والري عيان والكلام الفارغ ده ........والريس هيبدأ يتحاكم بتهمة السرقه ومصيره هيبقى السجن المشدد إن شاء الله

ودلوقتى رموا كل حملهم على شفيق ...وشفيق هيرحل إن شاء الله


ومرحبا بالحوار

لو عندكم نقط جديده انا موجود ....لكن لو هتكرروا الكلام انا مش هقدر اكرر الرد ....انتظر اولا رد على كلامى او أسباب جديده ....وشكرا على حواركم الراقى

وأرجو أن كل من يحب ان يشارك يقققرأ الردود اولا حتى لا نكرر الكلام ونضيع الوقت

[/b][/b][/b][/b][/b][/b][/b][/b][/b][/b][/b][/b][/b][/b][/b]

أنا شوفت المناظره دى على صفحتنا على الفيس بوك

بصراحه كان مفيش تكافوء خالص ...تفوق تام لرأى د خالد ...وده رأيى الشخصى وممكن يكون مختلف مع رأى حد لأن أنا كنت شايفه ان المفروض شفيق ده يمشى نقول مثلا بنسبة 30% لكن بعد المناظره دى شايفه دلوقتى انه يمشى بنسبة 100% بسبب الأدله القويه والطريقه المنطقيه اللى قالها د خالد


بس بقى عاوزه أقول حاجه كمان ...إحنا فى جروب شباب عشقوا مصر عملنا سبق صحفى لاننا عملنا المناظره دى قبل قناة اون تى فى ....شوفتوها أمبارح كان فى مناظره بين د علاء الأسوانى وبين شفيق على الهواء

والخبر نازل عندنا شافه بسمه نزلته ...بجد يا جماعه اللى مشافش المناظره دى فاته نص عمره هههههههههههههه علاء الأسوانى مسح بكرامة شفيق الأرض وبقى مش عارف يرد يا عينى والله صعب عليا هههههههههههه

بس بجد المناظرتين فيهم كتير من بعض وبعدين انتم بتقولوا هتكملوا المناظره هههههههه...هتكملوا أيه ؟؟

هو فاضل كلام تانى يتقال ؟؟؟

دا إذا كان شفيق نفسه معرفش يرد وراح كده انفعل وأتعصب يبقى مين بقى هيرد

وبعدين هو فاضل أيه تانى يتقال ؟؟

بصراحه ....الناس بتوع الحزب الوطنى دول معندهومش دم . يرحلوا بقى

وانا عجبتنى كلمة الفنان احمد عيد اوى ...لما اتصل بسيد على وقاله إحنا بنبدأ عهد جديد خلوا عندكم دم وأرحلو شكلكم وحش ....بجد والله شكلهم وحش ههههههههههههه

هههههههههههه طبعا انا كنت متوقعة ان اللى هيرد عليا واء حضرتك او اى حد مخالف لرايى هيقلى يا اما انت كلامك غلط يا اما يا نوسة انت مش فاهمة حاجة
عامة مش دى القضية
مفيش كلام اقوله او ارد بيه لان الكلام اصبح ملوش لازمة فى الموضوع ده
شفيق استقال
ويا عالم الدور على مين
ويا عالم برده بلدنا رايحة فين ؟؟


ويا عاااااااااااالم حاجات كتيرة اوى مسيرها ايه

رئيس الوزرا الجد معرفش عنه كتير ومش عايزة اعرف كمان انا كل اللى عاوزة اعرفه اخرتها ايه....................

استاذ عسل اسود بشكرك على كلامك
وانا مش ضدد اخواتى ولا ضد اللى كان حاصل فى الثورة بس بجد انا حاسة ان الموضوع قلب بفوضى ومش من الاخبار عشان محدش يقولى بتقرى او مش بتقرى انا بتكلم من اللى بشوفه كل يوم



ورغم ان كل اللى معارضنى هنا فاكرين انى يا حراام مبفهمش مع انى رغم اختلافى معاهم عمرى ما قلت ولا هقول عنهم كدة


وحضرتك بتقوللى ابنى البلد مع اخواتك نفسى والله بس اعرف اتحرك فى الشوارع براحتى اعمل اللى انا عوزاه ازااااااااااااااااااى ابنى وانا مش امنة على حياتى حتى اللى هى ابسط حقوقى المفروض

ده احتى الكلية يا عالم هنرجعها امتى ولا هنرجعها ولا لا


والله انا بعد الثورة على طول كنت متفائلة
لكن دلوقتى الموضوع قلب باكتئاب

وربنا يستر وتكون فعلا مصر رايحة على خير ده اكيد اللى كلنا بنتمناااااااااااااااااااااه

يا نوسه ابن عمى طالب فى كاليفرونيا لما دخلوا المدرج وعملوا دوشه الدكتور قالهم ايه الدوشه دى ...أتعلموا من شباب مصر ...وقالهم على مظاهرات التحرير !!!!

بجد إحنا داخلين على خير كبير

أيوه فى فوضه

بس شوفى مين يعملها ؟؟؟؟

ومين كان ضد الفوضى ....الفوضى الحقيقيه هى بقاء مبارك او اتباعه

بجد انتم عملتم إنجاز ولازم تكملوا وتواصلوا

أنا مع أستمرار مظاهرات التحرير طبعا طبعا

وهى مش بتعطل البلد ولا بتعمل فوضى

الفوضى مصدرها معروف

ولازم نعرف مين هم قوائم الوطنى الفاسدين ونحاسبهم

لازم جهاز امن الدوله القذر يتحل فورا

دى مصلحة مصر الحقيقه وده اللى هيمنع الفوضى

انتى معايا صح ؟

بصراحة لا انا مش مع حضرتك انا بقول المظاهرات تتوقف بجد احنا تعبنا هو مينفعش نطلب مطالبنا بهدوء وناخد فرصة اننا احنا كمواطنين نعمل حاجة للبلد دى انا والله نفسى اعمل حاجات كتير للبلد بس ما هو انا برده اهلى مش مستغنين عنى عشان افضل رايحة جاية والشوارع كلها اما بلطجية اما مظاهرات انا واصحابى قاعدين نفكر هنعمل ايه عاوزين نعمل بس نلاقى شوية استقرار


تانى حاجة ازاى يعنى امن الدولة يتحل يعنى لا يبقى فى شرطة ولا قانون طوارئ ولا امن دولة طب ما هى بقت كدة انسب مكان للمجرمين طب ده احنا فى الوقت ده بالذات محتاجين امن كتيييييييييير اوى
انا مع ان امن الدولة يحصل فيه تعديلات وتتحدد مهامة لكن يتلغى لا طبعا ازاااااااااى يعنى

هههههههههههههههه لا انا هختصر عشان حضرتك تتغدى
انا مقلتش انك ضد الشرطة


المفروض ان امن الدولة بيقوم بدور المخابرات الداخلية كون ان هو كان دوره حماية النظام فده غلط مش صح المفروض انه يقوم بدوره المحدد وهو المخابرات الداخلية


انا مبتكلمش ع الجهاز الحالى انا بتكلمع المفترض عشان كدة بقول يتعدل


حضرتك بتسالنى مظاهرات ايه اللى بتعطلنى لما طلبة مدارس بيعملوا مظاهرات بضرب النار رصاص حى ومولوتوف عشان اسباب ومطالب زى ايه بقى

زى ان السجاير متبقاش ممنوعة فى المدارس زى ان الطالب محدش يقوم سلوكه او يقوله اعمل ايه او متلبسش ايه وغيره انه يدخل ويخرج المدرسة وقت ما يحب وببجاحتهم بيوزعوا ورق بالمطالب دى
بيحرقوا الفصول عشان نتيجة التيرم مش عجباهم خلاص كل اللى مش عاجبه حاجة يتظاهر ويحرق عادى
هى البلد دى مفيهاش كبير
كل ده وحضرتك بتقولى ايه اللى معطلنى
لما عمال بيتظاهروا عشان يا حرام بيقبضوا عشر الاف جنيه بس يا عينى بجد
الموضوع قلب باستهبال اتعب واتخنق ولا افرح واتبسط

هههههههههههههههههه بتشرب سجاير وانت طالب بس اكيد معترف انها غلط وانها ممنوعة داخل المدارس

هى المظاهرات اللى فى المدارس والفئوية هى مش فى مصر برده............ يعنى ماثرة برده


لا متقلقش انا مش هعمل مظاهرة عشان مصروفى يزيد...ز انا مستعدة اتنازل عن المصروف كله بس كفاية مظاهرات هههههههههههههههههه



انا اقصد بكلامى عن امن الدولى مخابرات داخلية مبتلغيش دور المخابرات اللى هى وظيفتها تحمينا من الخارج
يعنى يبقى فى مخابرات فى الخارج واخرى فى الداخل الى جانب الشرطة
اوك يمشوا من الجامعة مش قضية لكن ميمشوش من البلد كلها