حنايا الأرض لصالح الرئيسي

من طرف **عذاري** الأحد 27 مارس 2011, 8:00 am

حنايا الأرض

سمـانـا يالبعيـدة يالبعيـدة مالنـا جنحان

نموت أحـرار دام إن النجـاة آخـر أمانينا

رمينا الملـح في كل المدن ما نحسب البلدان

نسافــر ما طعمنـا سكر الفرقى خطاوينا

تعبنا كثير ما نكتب عن الفرقى على الجدران

حبيبـي: مالهـا الجدران! ما تسمع مآسينا؟؟

كتبنا: يالعمـر شابت أمانينـا أسى وحرمان

ولا قـدّر لنـا قبلـة لقانــا فــي ليالينا

توادعنــا كثيـر ولا عرفنا ضحكة البيبان

ولا فــي بالنــا أول هـوانا لو يخطيّنا

أيادينــا نبت فيـا الحنين وحظها الفنجان

نقلب حلمنـا..خطـوط الأماني في أيادينا

نلــوّن في أمانينا من أحجار السهر ألوان

ونكبــر..لو تمـوت أحلامنا تبقى أسامينا

كبرنا اليـوم ما نرمي مآسينا على الأوطان

بتبقــى اوطاننــا مهمـا تغربنا..منافينا

كريمٍ يالنهــر مجراك لو يسقي فم الخلجان

لنــا الأقــدار يمٍ وين ما حطت مراسينا

سقى الله من لها بين المحاني مورد العطشان

على سـدرة صبـاها كم ننوح وكم تأسينا

عزانا الأرض نزرع في حنايا ترابها إنسان

قريبــة..لو رحلنــا أرضنا باكر تنادينا

بعيــدة يالسما..واللـي مثلنا مالهم جنحان

نموت أحـرار..لو شاب العمر تبقى أمانينا