ايفينت بمليونية الجمعة 20 مايو

من طرف **dandana ali** الخميس 19 مايو 2011, 8:50 pm

اسباب مليونية هذة الجمعة:
الإيفينت ده بدأ كدعوة لرفض اعتذار مبارك اللي الجرايد كتبت عنه امبارح.. لكن ناس كتير بعتوا يقولوا لنا انها المفروض تكون دعوة لحاجات تانية كتير كلها مرتبطة برفض الاعتذار برضه.. وطبعاً عندهم حق.. احنا نازلين يوم الجمعة ان شاء الله نحمي الثورة من الالتفاف اللي بيحصل حواليها.. احنا عايزين اللي بيقول كفاية حرام عليكوا البلد بتضيع يسأل نفسه: هل الثورة نجحت فعلاً؟ وإذا كانت نجحت يبقي ليه مبارك ما تمتش أي إجراءات جادة في محاكمته علي قتل... الثوار لحد دلوقت؟ هاتقولوا لي بيتحقق معاه.. هاقول لكم كله تحقيقات ف الكسب غير المشروع ودي سهل جداً فريد الديب يطلعه براءة منها.. وأظن البشاير بدأت تبان النهاردة ف اللي حصل مع سوزان وزكريا عزمي.. وبعدين فين تهمة إفساد الحياة السياسية.. ولا هو ما أفسدهاش لا سمح الله؟؟ حتي العادلي ما اتحكمش عليه إلا ف غسيل الأموال... أما قتل الثوار فتأجيل تأجيل وخلاص... اللي يبقولوا لنا نفوق ياريت يفوقوا هما.. لحد دلوقت أهالي الشهداء نارهم ما بردتش بحكم واحد يوحد ربنا.. دي حتي المحاكمات ما بيسمحش لهم فيها انهم يشوفوا المتهمين.. والمحكمة بتحط ف الأقفاص أمن بملابس مدنية يحجب عنهم الرؤية.. هل ده يصح؟؟ بلاش دي.. حد يقوللي ازاي عادل عبد السلام جمعة هو اللي ماسك قضية العادلي بتاعة قتل الثوار؟؟ مش هو ده برضه القاضي اللي أمن الدولة أمره يحكم علي أيمن نور بخمس سنين؟؟ مش هو ده برضه اللي حكم ف قضية هشام طلعت مصطفي والسكري ؟؟ مش هو ده اللي أمن الدولة كان مديله عربية وطقم حراسة مكون من 11 فرد أمن؟؟ هل ده ينفع قاضي ف مصر الثورة؟؟ بلاش دي.. ليه مافيش عقوبات رادعة للي بيثيروا الفتنة الطائفية وبيوقعوا المسلمين والمسيحيين في بعض؟؟ ليه المحليات ما اتحلتش؟؟ ليه المحافظين الفاسدين في أماكنهم؟ ورؤساء الجامعات والعمداء؟؟ ليه الحزب الوطني المنحل ما اتجمدش نشاط أعضائه عشر سنين ع الأقل عشان نضمن البلد تنضف ومانلاقيهمش ف المجلس اللي جاي؟؟المجلس اللي هايعمل لنا الدستور؟؟ بلاش دي.. ليه جهاز الأمن الوطني هو صورة طبق الأصل من جهاز أمن الدولة؟؟.. والكلام ده والله العظيم أكيد وشهادة ربنا يحاسبني عليها.. قيادات أمن الدولة اللي كانوا بيعذبوا المعتقلين لازالوا بيشغلوا مناصب هامة في الأمن الوطني .. وفيه اتنين من المحافظين الجدد من ظباط أمن الدولة السابقين وإيديهم ملوثة بتعذيب إخواتنا ف المعتقلات..ليه مافيش محاكمات جادة للظباط اللي قتلوا الثوار؟؟ ليه مافيش تحفظ عليهم أثناء التحقيق معاهم؟؟ إزاي مدراء الأمن المتهمين بقتل الثوار بيتحقق معاهم وبعدين يروحوا مكاتبهم عادي جدا؟ إزاي ما اتوقفوش عن العمل؟ هل صعب عليهم وهما ف أماكنهم يفسدوا الأدلة وبكده يطلعوا هما وأسيادهم براءة ودم الشهدا يروح هدر؟ بلطجة رجال الشرطة اللي سايبين البلد سداح مداح آخرتها إيه؟ ليه مافيش محاكمات عسكرية ضد الظباط اللي رافضين ينزلوا شغلهم .. واشمعني بنحاكم المدنيين محاكمات عسكرية لمجرد انه تظاهروا أو اعتصموا؟؟ يحي الجمل بيعمل إيه ف مكانه؟؟ اللواء محمد البطران اللي اتقتل برصاص الشرطة في سجن القطا لأنه كان ناوي يبوظ مخطط الانفلات الأمني -وفيه شهود علي كده- ليه مافيش تحقيق جاد ف مقتله لحد دلوقت؟؟ بلاش كل ده.. خلينا ف الاقتصاد اللي تاعب كل الناس.. ليه فيه تعتيم وكل اللي بنسمعه مجرد تصريحات بتصب ف مصلحة الثورة المضادة؟؟ ليه تخويف الناس من اننا هانفلس وهانشحت وبس من غير مصارحة بالتفاصيل؟؟ ليه ما تتشكلش لجنة مثلاً من خبراء اقتصاديين وطنيين ومحترمين يبحثوا الوضع ويطرحوا مشروع يشترك فيه كل الشعب بحيث يكون زي اكتتاب ننقذ بيه اقتصادنا.. ده لو فيه أزمة فعلاً؟؟ ليه وزير المالية يروح يستلف من صندوق النقد الدولي.. ونقبل تاني ذل أمريكا وشروط أمريكا بعد ما افتكرنا انا استردينا كرامتنا؟؟ .. ليه يوم ما يجيلنا وزير خارجية محترم ونقدر نرفع راسنا قدام إسرائيل ياخدوه مننا ويحطوه ف جامعة الدول العربية اللي لا هايقدر فيها لا يهش ولا ينش؟؟ ليه مستكترين علينا نقف ف وش إسرائيل مرة واحدة ف حياتنا؟؟ هي الثورة نجحت ولا لأ؟ الثورة نجحت ولا احنا اتكتب علينا نفضل نقول نعم وطيب وحاضر لأمريكا وحبيبتها إسرائيل طول العمر؟؟يا جماعة فيه آلاف من علامات الاستفهام اللي لازم ننزل التحرير عشان نلاقيلها إجابات .. اللي بيحب البلد دي بجد وخايف عليها بجد ينزل معانا.. وبدال مايقول لنا انتوا بتخربوا البد.. يفتح عينيه ويفكر بمخه كويس وهو يفهم ان البلد دي رايحة فعلاً للخراب لو سكتنا .. اللي يستحمل دم الشهدا يبقي ف رقبته يقعد ف بيتهم .. لكن احنا نازلين ان شاء الله.. لأن
اللي ماتوا عشان يجيبوا لنا حقنا ما يستاهلوش مننا التقاعس ده...

(ايفينت جمعة رفض الاعتذار والالتفاف حول الثورة بالفيس بوك

من طرف **لؤلؤة** الجمعة 20 مايو 2011, 12:06 pm

اللهم احمى الثورة المصرية والثوار
اللهم احمى مصر واجعلها بلد الامن والامان
وانصرنا على اعداء هذا البلد

تسلمى يا دودى

ايفينت بمليونية الجمعة 20 مايو

ايفينت بمليونية الجمعة 20 مايو

رد: ايفينت بمليونية الجمعة 20 مايو