يوم سجده ..الإنتخابي !!!!!

من طرف **سجده** الإثنين 29 نوفمبر 2010, 3:36 pm

بسم الله والحمد لله والصلاة والسلام علي رسول الله سيدنا محمد وعلي آله وصحبه وسلم .

اخوتي الأعزاء

حبيت أنكم تشاركوني وأعرفكم تفاصيل يومي الإنتخابي وحبيت أنقلكم اللي حصل فيه كمان كشهاده أدلي بها امام الناس امام المصريين والعالم أجمع

اللي حصل اني صحيت بدري صليت الفجر وعقدت نيه لله وخرجت متوجهه لللجنه ووصلت الساعه 7.5 صباحا . ودخلت المدرسه الابتدائيه المقرر فيها الانتخاب وطبعا لقيتها عباره عن مزبله او اصطبل مينفعش يقعد فيه بني آدم ابدا ابدا وطبعا مفيش عمال نظافه مع اننا في مركز المفروض انه محترم بس اللي حصل غير كده خالص .
المهم دخلت لجنتي اللي المفروض اني مندوبه فيها ومعايا توكيل خاص وطبعا علشان يبقي معايا توكيل لازم اسمي يكون فيها في الكشف الانتخابي ولقيت اسمي بعد طلوع الروح يعني رحت انتخب اسمي كمان مش موجود ادور مره واتنين والتسلسل ملخبط وعلشان الاقي اسمي جبت محامي فضل يدور في اللخبطه لحد مالاقي اسمي . المهم لقيت رئيس اللجنه وكان انسان فاضل محترم ضيف مش من المركز طبعا هو وكل اعضاء الجنه قرفان ومستاء من الوضع وطلب مني انتظر دقائق في الخارج وفوجئت بيهم بيكنسوا الفصل باسكتش كان في احد المقاعد . طبعا انا اتقهرت وصعب عليا ضيوف أفاضل يحصلهم كده بس لأسف مكنش عندي حل غير اني انتظر .
وفجأه ظهر مدير المباحث جاي ومعاه الحاشيه بتاعته ولف اللجان لجنه لجنه وأصدر امر لكل اللجان وهو ان المندوب اللي عامل توكيل قانوني من الشهر العقاري ومختوم بختم النسر ميدخلش اللجنه ممنوع منها . واللي هيدخل هوه اللي معاه توكيل مختوم بختم المركز وطبعا المامور ماضي عليه . طبعا كان بقالنا 4 أيام في المركز والمحامين طالع روحهم علشان يعملوا التوكيلات وبعد كده هههههههههههههه ممنوع دخول الأخوان للجان علشان ظهرت اول لعبه قذره من لعبهم المعتاده .
المفاجاه اني في الفتره ديه كنت اتصاحبت علي مندوبات الحزب الوطني اللي مكنش غيرهم بس في اللجان وطلبت منهم توكيلاتهم وفعلا شفتها مختومه بختم المركز وامضاء المامور . ومش كده وبس احنا لقينا كلللللل المندوبين معاهم التوكيل المتفق عليه الا احنا ومندوبة من مندوبات مرشح الوفد ومندوبه من مندوبات مرشح مستقل (لواء).
توجه البعض منا الي السيد المامور وطبعا كان رده الجاهز انتو جايين دلوقتي الساعه 8.25 تختموا ؟ خلاص مفيش أختام .
وطبعا اضطرينا للجلوس علي باب اللجنه وكان رئيس اللجنه وأعضاءها والغفير اللي قاعد معايا علي الباب وكمان الملازم في منتهي الرقي والأدب والأخلاق وكانوا بيقولولي انتم علي راسنا من فوق بصراحه لما شفت اخلاقهم زال عني كل ضيق كلهم كانوا متعاطفين معانا وزهقانين من اللي حصل وكنت قاعده علي الباب بالظبط متابعه كل حاجه بره وجوه وسبحان الله الإحصائيه كنت بتابعها بشكل افضل من مندوبات الداخل والناس هونت عليا كل حاجه ( ربنا يحفظهمم وينفع بيهم وعمري ما هنساهم ولا هنسي أفضالهم واخلاقهم )
المهم العصر جات مندوبة مرشح الوفد والمستقل قعدوا جنبي وقالولي ان سيادة المأمور ختملهم ومضالهم الظهر !!!! وطبعا لا تعليق غير حسبنا الله ونعم الوكيل
وطبعا البلطجيه واقفين علي الباب والست اللي بتبيع في السوق معاها توكيل عام وداخله طالعه في اللجان ولا كانه بيتهم وقاعده تزعق في كل اللي ميعجبهاش وصوتها جايب آخر المدرسه ولا كانها المأمور ولا سيادة الريس حتي الضابط بتزعقله وحاجه صعبه جدا تخلي الواحد يصعب عليه حاله ولا حول ولا قوة الا بالله .

ومقتلكمش ان الكشوف كانت ملخبطه والأسماء واقعه منها والناس تيجي متلاقيش اسماءها مع انها موجوده في الكشوف اللي قاعد بيها اعضاء الحزب الوطني نفسهم .
ناس كتيييييييييييييير تيجي وتروح واسمها راح فين ؟ الله اعلم!!!!!!!

دا غير الناس الي ماتوا واساميهم موجوده !!!!!!!!
والناس محبطه ومش راضيه تروح تنتخب ونسبة الاقبال عندنا لا تتعدي 10 في المائه
ولجنتي كانت 918 ماانتخابش غير 116 !!!!!!!!!!!! والباقي اساميهم مش هنا ! او محبطين وياءسين وبيقولوا الحكومه هتعمل اللي هيا عاوزاه .
واليوم خلص والصناديق اتشمعت وكل صندوق فيه حاجه وخمسين ورقه !! مش عاوزين صندوق دول عاوزين حصاله !
وطلعت الصناديق علي المركز والبلطجيه حارسينها والشوم والنبابيت والنار ماليين الشارع !

هوايه ده يا بلدي ؟ وليه كده يا مصر ؟

روحت والقهر ماليني لما قالي رئيس اللجنه انا بعلم اولادي الصدق والأمانه وعاوزهم يطلعوا محترمين متخافيش التزوير مش هييجي من عندي انا لجنتي هتبقي تمام التزوير هيحصل هناك .
ولا الكلمه اللي قالتهالي عضوة في الحزب الوطني : النتيجه معروفه يا دكتوره واحنا عارفينها من امبارح ,مرشحي الحزب خلاص فازوا ّ!!

قلت ليه كده ! ليه يا بلدي حالك كده؟ ليه كل ما يحاولوا ولادك يطلعوكي خطوة ترجعي عشره ؟
ليه ولادك بيضربوا بعض ؟ ليه بيقتلوا بعض؟ ليه يكرهوا بعض ؟ ليه يخوضوا في اعراض بعض بالباطل علشان الانتخابات ؟
فين الأمان ؟ وفين العدل فيكي ؟ ليه اللي بيحبك بيتقتل؟ وينضرب؟ ويتهان ؟ ويهاجر؟ ويتغرب ويتعذب ؟

بس والله يا مصر ما هنسيبك للخونه اللي بينهبوا فيكي وفي شعبك ؟ وراكي يا مصر لحد ما تبقي اجمل بلاد الكون وبكره قلوب ولادك تصفي وتحب وتطهر وتعمري بالامان !

بكره امتي ؟ مش عارفه وخصوصا بعد اللي حصل ! بس اللي اعرفه ان أكيد بكره جاي .

بس عاوزه اقولكم اننا أمل الأمه وان محدش هينقدها غيرنا بس جددوا نيتكم واتعلموا تتوحدوا وتحبوا بعض . اتعملوا انكم مسلمين مينفعش تكرهوا بعض علشان مصالح واهواء مينفعش يكون هدفكم سرقة بلدكم .انا اتصاحبت علي مندوبة الحزب الوطني وحبيتها وكنا كوييسين جدا لانها محترمه بالرغم من انها حزب وطني بس مستاءه من الوضع وقرفانه من اللي بيعمله الحزب في مصر ونفسها في حد شريف ياخد بايد البلد و انا احترمتها وكنت اخت ليها. .
بلاش يا ولاد بلدي نقع فريسه للي عاوزين يقسمونا ويفرقونا احنا طول ما احنا احرار وشرفاء لازم نكون واحد سواء احزاب او جماعات . متنسوش اننا مسلمين
ومتنسوش تخلصوا لله وتجددوا نواياكم . وتنتبهوا لاعداءنا وتردوهم خاسرين .
انا تعبانه جدا وصعبان عليا اني بحب بلدي ويتعمل فيا كده .
بس مش هيأس بالعكس انا أقوي وأقوي وانتم كمان محدش يزعل من بلدنا لانها محتجالنا ومحتاجه لحبنا .

جزاكم الله خيرا
والسلام عليكم ورحمة الله وبركاته .

من طرف **dandana ali** الإثنين 29 نوفمبر 2010, 3:59 pm

بصى انا راجعه تانى لقراءه الموضوع الشيق ده بتمعن هههههههه

بس الف الف الف مليوووون ههههه

حمدلله على سلامتك
ياقمر

من طرف monmona الإثنين 29 نوفمبر 2010, 4:05 pm

إن شاء الله ياسجدة بكرة هيكون أحسن بنا .. وألف مبرووووووووووك على اختيارك أحسن عضوة فى المنتدى

من طرف **عذاري** الإثنين 29 نوفمبر 2010, 5:56 pm

لا حول ولا قوة الا بالله
الحمدلله على سلامتكم
الله يحفظكم من كل شر
اللهم اميييين

من طرف **سجده** الإثنين 29 نوفمبر 2010, 6:24 pm

الله يسلمكم يا حبيباتي

والله يبارك فيكي يا امنيه

وجزاكن الله خيرا

من طرف لحظه غروب الثلاثاء 30 نوفمبر 2010, 4:43 am

معلش بقى يا سجده تعالى هنا وانا هنتخبك يا ستى

بزمتك حد يروح لجنه وكده أحمدى ربنا أنك رجعتى سليمه أصلا

أنا شوفت فى الحامول اللى يخلى الراس تشيب

الله يكون فى العون

وحمد الله على سلامتك

بس أيه مش قولتى هتترشحى وهيبقى لينا دهر فى المجلس ههههههههههههههههههههه

يوم سجده ..الإنتخابي !!!!!

يوم سجده ..الإنتخابي !!!!!

رد: يوم سجده ..الإنتخابي !!!!!

رد: يوم سجده ..الإنتخابي !!!!!

رد: يوم سجده ..الإنتخابي !!!!!

رد: يوم سجده ..الإنتخابي !!!!!

رد: يوم سجده ..الإنتخابي !!!!!