اوعوا تفتكروا ان حد من الفريقين هيكسب والتاني هيخسر ..لالالا

من طرف **سجده** السبت 19 مارس 2011, 8:40 pm

تعليق جميل منقول من الجروب بتاعنا شباب عشقوا مصر :

بدايةً من النهارده الساعة سبعة باللّيل وبعد ما يخلص الاستفتاء؛ الفرقتين اللي كُنّا فيهم دول لازم ينضمُّوا لبعض فورًا، من فضلكوا شيلوا حتّى

صُور نعم ولا، إوعوا تبقوا عُبط وتفتكروا إن حَد من الفرقتين حيكسب والتاني حيخسر، الحقيقة اللي لا خلاف عليها هي اننا يا حنكسب كُلّنا مع

بعض يا هنخسر كُلّنا مع بعض، هو احنا بس مُختلفين شوية فيما بيننا في تعريف المكسب والخُسارة.
.
بس في كُل الأحوال وأيًّا كانت النتيجة لازم نتوحّد ونتّحد تاني إستعدادًا للخطوة الجايّة أيًّا كانت، نتيجة إستفتاء النهارده حتتحوّل بعد ساعات لواقع

مانقدرش نغيّره وإن كُنّا سنطمح دايمًا انّنا نكمّل عليه عشان نخلّيه أحسن وأحسن.. وحتّى إن أظهر المُستقبل القريب أو البعيد إن أغلب المصريين

اختاروا غلط النهارده، ماحدّش من حقُّه يقول "مش قلتلكو؟ ومش قُلنالكو؟" والكلام ده كُلّه مضر وبايخ وسخيف، الفروق اللي بينّا كأشخاص هي

اللي خلّت كُل واحد يشوف ان الصواب في اتّجاه مُختلف، كُل ما اتمنّى أكتر من أي حاجة تانية إن الصواب ده يكون كان بيعني في أذهان الجميع: "مصلحة الوطن والجميع"

يعني بعد اعلان النتيجه خلاااص كلنا هنشتغل لمصر مفيش وقت
الايادي هتتشبك والقلوب هتتآلف ومصر فوق الجميع

من طرف بنت بورسعيد الأحد 20 مارس 2011, 12:09 pm

طبعا كلنا هنعترف بنتيجة الأستفتاء بغض النظر هى أيه

وحتى لو كانت ضد وجهة نظرنا

لكن أى حد كدب على الناس علشان مصلحته الشخصيه مش هنسامحه وأى حد خدع الناس هيبدأ يتكشف

واللى ضحك على الناس وقالهم نعم علشان الأستقرار يبقى يوريهم أيه وفين الأستقرار

؟؟؟

وكمان اللى كفر اللى قال لالالا هننتظر يقولنا أيه هى كفارة ذنب من قال لالالا علشان ننفذها

من طرف **سجده** الأحد 20 مارس 2011, 1:03 pm

اكيد اكيد

وبرده المفروض كلنا نسامح الناس اللي قالت علي اخواتهم اللي قالوا نعم انهم خانوا مبادئ الثوره

وانهم بتوع مصالح وبس وخونوهم وقاولوا كلام ميصحش من اخ لاخوه

كله كله هيتصلح ان شاء الله

واحنا اكيد كلنا ايد واحده وبنحب بلدنا

وهنهدي علشان ميحصلناش حاجه ولا إيه ؟

من طرف ???? الأحد 20 مارس 2011, 2:01 pm

طول عمرى بحترم الإخوان

وبدافع عنهم مع انى مش معاهم خالص ويمكن كتبت كلامى ده هنا قبل كده فى أكتر من موقف

لكن بصراحه المره دى فى الأستفتاء ده حسيت أنهم بيدوروا على مصلحتهم وخلاص

يمكن فى ناس منهم كأشخاص كانوا مقتنعين لكن فى ناس منهم برضه بدأت احس انهم مش حلوين

خصوصا انى دخلت فى كذا مكان ولقيت أن الإخوان بيشتموا إبراهيم عيسى لمجرد انه أختلف معاهم فى الرأى مع أنه النهارده قال انه بيحترم رأى الناس وان مصر قالت نعم بحريه

أما بالنسبه للسلفيين فطول عمرى بكره كل حاجه فى الدين بسببهم والمره دى اتعقدت

لانى أصلا كانت وجهة نظرى فى الأستفتاء ده أنه نعم للتعديلات

وروحت علشان أقول نعم

منعونى وكانوا عاملين مشاكل كبيره

لمجرد بس إنى مش محجبه يبقى هقول لالالا ويضيقوا عليا

مع انى كنت هروح أصوت بنعم

وبسبب الدوشه والمشاكل اللى عملوها فى سيدى بشر خوفت ورجعت واتحرمت أنى أحط صوتى فى أول أستفتاء نزيه فى مصر

لمجرد بس أنى مش محجبه

فما بالكم لو حكمونا

!!!!!!!!!!!!!!!!!!!!!!!!!

دلوقتى بدأت أفهم المسيحين واعذر خوفهم فعلا حاجه تقلق

وده مش جديد على السلفيين لكن الجديد غن الإخوان يشوفوا ده ويطنشوا !!!! يمكن لانه كان فى مصلحتهم ؟؟؟؟؟؟؟ !!!

من طرف **لؤلؤة** الثلاثاء 22 مارس 2011, 5:08 pm

يا جماعة النتيجة ظهرت واحنا قولنا هنقبل بيها مهما ان كانت
مش وقت اى حد يدور على عيوب غيرة وقال ايه وعاد ايه
دلوقتى لازم يكون همنا الاكبر زااااااااى هنبنى بلدنا
اللى كنا مستعدين نموت عشانها

من طرف بنت بورسعيد الأربعاء 23 مارس 2011, 9:13 pm

وهنهدي علشان ميحصلناش حاجه ولا إيه ؟

مش فاهمه تقصدى ايه يا مرام بكلامك ده او بالجمله دى بالتحديد ؟؟؟؟!!!!!

يعنى أيه أهدى مش فاهمه !!!!

اوعوا تفتكروا ان حد من الفريقين هيكسب والتاني هيخسر ..لالالا

اوعوا تفتكروا ان حد من الفريقين هيكسب والتاني هيخسر ..لالالا

رد: اوعوا تفتكروا ان حد من الفريقين هيكسب والتاني هيخسر ..لالالا

رد: اوعوا تفتكروا ان حد من الفريقين هيكسب والتاني هيخسر ..لالالا

رد: اوعوا تفتكروا ان حد من الفريقين هيكسب والتاني هيخسر ..لالالا

رد: اوعوا تفتكروا ان حد من الفريقين هيكسب والتاني هيخسر ..لالالا

رد: اوعوا تفتكروا ان حد من الفريقين هيكسب والتاني هيخسر ..لالالا