مذكرات طبيب إمتياز

من طرف Dr.Oraefy الإثنين 04 أبريل 2011, 9:30 pm

مذكرات طبيب امتياز.... المطلوب منى فى نهاية الإمتيااااز أكون إخترت تخصص طبى وهذا مارأيت فى رحلة الأحزااااااااان... اليوم قررت أن أخذ جولة في القصر العينى لأعرف أكثر و احاول الاختيار ... قررت أن أبدأ بالباطنة...أم الطب ( لا أقصد الشتيمة و لكن المعني ) و طبعا بيت الباطنة هو الاستقبال..بحثت حتي وجدته...يبدو لطيفا من الخارج..دخلت فوجدت ازدحام شديد..شكلي هتعلم حلو أوي هنا... ركزت و لقيت ناس بتزعق و ناس بتحوشها --أنا هطلع ( تيت ) الدكتور ده...يعني ايه معندوش سرير رعاية..طب وحياة أمه لأروح أجيبله سرير من عندي و يبقي يوريني مش هيدخلها ازاي ثم نظر لي الرجل شذرا و أنا لابس البالطو : انت دكتور هنا ياد ؟ تلعثمت و فكرت قليلا ثم قلت : لأ طبعا أنا تمرجي...ملعون أبو الدكاترة يا شيخ انفرجت أسارير الرجل ثم تركني و كمل زعيق و مشي مصرا انه رايح يجيب سرير من البيت و راجع...عادي..مشاكل بتحصل في أي مستشفي..خلعت البالطو تفاديا لأخطار المهنة العادية ثم دخلت الاستقبال...بحثت عنه ولما وجدت أشياء تشبه سراير...أدركت ان دي غرفة الاستقبال..حسنا..يمكن دي امكانيات المستشفي..ده ميمنعش صنبور العلم الغزير اللي هيغرقني هنا بحثت عن النائب..ملقيتش غير واحد بس لابس بالطو...أكيد هو مع انه شعره الاشعث و ذقنه الطويلة و حركاته الحادة متديش علي دكتور أوي و وجدته يتحدث مع عدة أشخاص.. --نائب الباطنة : يا ستي بقولك روحي اعمليلو اشاعة علي دماغه...مش طلعي عليه اشاعة..يا ستي حرام عليكي بقالي ساعة بفهم فيكي طلعتي عين أمي --الست : لا مؤاخذة يابني.. طب يعني اجيبله 2 كيلو سمك عشان دماغه تشعشع كدة؟؟ --النائب (بيأس ) : ماشي يا حاجة...بس بسرعة عشان يلحق يشعشع .. ثم التفت الي شخص أخر ( بحدة ) : وانت يا أستاذ مرحتش جبت نتيجة التحليل ليه... الراجل عاوز أطلعه يغسل --الرجل ( يبدو محترما ) : يغسل ايه يا دكتور حرام عليك..هو عشان احنا غلابة تخلونا نغسل هدومكو قصاد العلاج..يا أخي اتقي الله ده الراجل تعبان --النائب ( بثورة ) : يغسل كلي...يغسل كلي..هدومي ايه اللي يغسلها يا جدع انت..أنا محلتيش غير البالطو ده قررت التدخل قبل أن يصاب النائب بجلطة ..مجرد أن رأني صرخ و قال : --و انت مرحتش خدت الحقنة الشرجية ليه..انتو متجوش غير يالعافية..يا محمد تعالي اديله الحقنة الشرجية شعرت بخوف و قرت أن الحقه قبل أن ييجي محمد : لا يا دكتور مش أنا بتاع الحقنة الشرجية أنا امتياز و كنت عاوز ... --النائب ( و اللعاب يتسايل من فمه ): امتياز...امتياز...طب روح مع الراجل ده دخله الحمام و هاته و تعالي تاني عشان عاوزك..أقولك هات موبايلك رهن... وجدت شخص يرتدي قميص و بنطلون يدخل الاستقبال و بيزعق في النايب : --يا حمار أنا مش قايلك تودي الراجل الحمام بنفسك...بقولك ده جوز الشغالة بتاعة مرات خالة المدام..تبعت معاه امتياز حمار النائب : حاضر يا بيه..يلا يا حاج...لأ متجيبش مناديل أنا معايا شعرت بالاهانة..ثم ابتلعتها...أمال لو بقيت نايب عنده الراجل ده هيعمل فيا ايه...و بعدين حمار ايه في الحمام يعني...هشدله السيفون غلط يعني...المهم انتظرت النايب لحد ما رجع من الحمام وسط اسئلة كثيرة من الناس مثل : لو سمحت امشي منين...فين الدكتور...أقعد و لا أقف...الدوا ده حلو؟ أين أشيائي ؟ لم أرد حتي رجع النائب .. --النائب : شفيتم يا حاج --أنا : يا دكتور أنا هروح أجيب أكل تحب أجيبلك معايا؟ --النائب ( بفرح شديد ) أيوة أيوة...أنا بقالي 6 أيام مكلتش..هاتلي 7 سندوتشات..لأ هاتلي 8 سندوتشات و ظل يبحث في جيبه لحد ما طلع جنية واحد...ثم نظر لي بحرج --طب هاتلي و أنا هحاسبك بعدين ابتدأت أدرك ان مش دي النيابة الي أنا عاوزها...و كدت أمشي من الاستقبال.. --النائب : ممكن استلف دقيقة من موبايلك..عشان أكلم نايب القلب عشان العيان بس... صعب علي العيان..و اديته الموبايل..و انتظرت نايب القلب..ابتديت أفكر في نيابة القلب دي...المهم لقيت نايب القلب داخل...يبدو فخورا و فرحان بنفسه..أكيد الراجل ده عالم.. --نائب القلب ( ينظر في رسم القلب و يحدث نائب الباطنة ) يا دكتور انت شايف المليمتر ده..ده معناه ان مفيش حاجة..ازاي تندهلي كدة من غير لزوم... ازددت اعجابا به..أكيد ده عالم كبير...المهم طلعت معاه بعد ما العيان مشي...قابلنا مدرس للقلب فوق... --المدرس : ايه اللي في ايدك ده يابني --نائب القلب : ده رسم قلب بتاع عيان بس مفيهوش حاجة اعجبتني ثقته في نفسه...و بدأ أفكر جديا في تلك النيابة --المدرس ( ينظر في رسم القلب و يثور ) : يا نهار اسود..انت مشيت العيان ده.. و لما انت حمار..بتنزل الاستقبال ليه..انت مش هتروح لمدة شهر..لأ شهر ايه..انت مش هتروح تاني أصلا خلعت من الموقف بهدوء...و بعدين بقي...؟؟ قررت أن أطلع دور واحد و اروح قسم الامراض العصبية..أنا كنت بحب النفسية و العصبية بحثت عن النائب حتي وجدته و كان بيمر علي العيانين..فرصة أمر معاه..مررنا بمريض لا يتحرك و لا يتكلم و لا ينظر لك و انت بتكلمه النائب : دي بقي متلازمة ( الحنكليس المائي ) ..و علاجه تجريتول و ديباكين مررنا بالمريض اللي بعده...و اذا به نسخة من هذا الحنكليس المائي. --أنا : و ده نفس المرض اللي فات --النائب : لأ .. دي متلازمة ( الدواخل خارجة من فوق بس ) و علاجه تجريتول و ديباكين تعجبت قليلا..ثم مررنا باللي بعده..لأ بقي ده أكيد نفس المرض --النائب : دي بقي متلازمة ( العصعوصة التائهة ) و علاجها .. --أنا ( مقاطعا ) : تجريتول و ديباكين --النائب ( باعجاب ) انت هتبقي نايب شاطر قوي --أنا ( في سري ) : مكانش اتعذر.. قررت أن اذهب لمستشفي النفسية يمكن الشق التاني من النيابة دي يطلع حلو...دخلت غرفة النواب حتي اسألهم....ثم توقفت منبهرا...ايه اللي جاب الفور كاتس هنا --احداهن : خير يا دكتور ؟ --أنا ( تائها ) أنا ؟؟! --الأخري : أيوة..خير في حاجة يا دكتور --أنا : لأ لأ عاوز سلامتك..اللي أنا عاوزه عرفته خلاص و أنا نازل علي سلالم المستشفي قررت أن أضع النيابة دي في دماغي....ثم وجدت أخد الاشخاص يقترب لي و لازق فيه( وطبعا ده مريض =مجنون يعنى ) صوت من بعيد : يا حسين تعالي بقي انت كل يوم تعض واحد.. ده مش التمساح الشرس يا حسين تعالي بلعت ريقي بصعوبة.. و نظرت لحسين : لأ يا حسين مش أنا التمساح الشرس صدقني الصوت : غنيله ( أما نعيمة ) و ارقص و هو يسيبك لم أجد حلا سوي أن اغني و أرقص.. ولا داعي لأن أتذكر هذا الجزء في مذكراتي..الساعة الأن 4..عاوز الحق اروح قسم الاشعة..روحت و لقيت القسم قافل..ابقي أعدي بكرة بقي اليوم ذهبت لرؤية أقسام الجراحة..برضه الجراحة ليها سحرها خصوصا بعد يأسي من الباطنة...دخلت الاستقبال و وجدت النائب مشغولا بعض الشئ...مرتديا قفاز ووجدته يقوم بفحص شرجي لأحد المرضي --النائب : يا أستاذ رخي نفسك شوية --المريض : أاااااااااااااااااااااااااااااااااااااااه --النائب ( يجاهد بيده كأنه بيفك موتور ) : خلاص قربت أوصل استني --المريض : أااااااااااااااااااااااااااااااااااااااااااااااااا اااه --النائب ( يخرج يده ) خلاص خلصت..شوفت بقي..طلع معندكش حاجة ثم التفت لي : نام علي السرير يا أستاذ أنا : لأ لأ أنا امتياز و كنت عاوز اسأل حضرتك علي .. النائب ( يمد لي يده بنفس الجوانتي ) : أهلا أهلا يابني أنا ( مشاورا علي الجوانتي ) الجوانتي يا دكتور.. فجأة انقلبت الدنيا و دخل واحد مضروب بسنجة في بطنه..ايه العيشة دي..النايب جري للراجل و بدأ يفحصه..و لكن لحظة ..ده نفس الجوانتي !!!!! النائب ( يقلب جوه الجرح بالجوانتي ) :متخافش متخافش مفيش حاجة..السنجة مجابتش معاميعك... ثم صرخ قائلا : شوية بيتادين يا هبة و دخليه حد يسرفله و قفليه..بس قفليه حلو عشان ده تبعنا قررت أن اخرج قبل مارجع علي النايب... وجدت استقبال العظام في وشي..قلت أدخل..يمكن بقي يعجبني.... النايب : يا أم أحمد هاتي شيكارة الجبس..الراجل هينشف مني أم أحمد : عندك شوية فاضلين في القصعة... النايب : أعمل بيهم ايه دول..مش هيقضوا مصلحة...طب خلي ايدك كدة شوية يا أستاذ علي ما نبعت نجيب شيكارة...يا أم أحمد هاتي المنشار قررت أن أخدها من قصيرها قبل التطور للشواكيش و المسامير و سكينة المعجون..واضح ان طموحي ليس في التخصصات الجراحية..الساعة دلوقتي 2 الحق اروح اشوف قسم الاشعة...المهم رحت و غريبة وجدت القسم قافل...هو في ايه الضبط !! ذهبت أول حاجة لقسم الاشعة..و لكني برضه لقيته قافل لأن النهاردة الجمعة...هو القسم ده بيفتح امتي !! المهم قررت الذهاب لمستشفي النسا عشان أشوف برضه...دخلت علي أحد الاقسام اللي كان فيها مرور..كويس برضه فرصة اتعلم..و لكني للوهلة الاولي اعتقدت اني قاعد علي قهوة من كتر الألفاظ المؤذية اللي سمعتها(للأسف لأن معظم دكاترة النسا الأساتذة يعنى لسانهم طويل 3حبات) المدرس : تيت..تيت ..يا تيت يابن التيت..ازاي تتيت تيت الست دي النايب : يا بيه ماهو.. المدرس ( يضربه علي صدره و يلزقه في الحيط ) : انت هترد يا تيت يابن التيت..تراباتاتاتيت تركتهم و ذهبت لكشك التوليد..و هناك وجدت منظر غريب...شئ ما يشبه الأفيال بنفس اللون الازرق الباهت راكب علي أحد النواب و قاعد بيلطشه مع العديد من التيت..ثم حمله و قفز به من أحد السراير علي الارض و لما قام النايب يجري..جري هذا الفيل وراءه و بيضربه بالشلاليت...غريبة..ايه الي جاب فيل هنا!! أحد الممرضات ( تنده علي الفيل ) : يا دكتورة تعالي و سيبك منه..الولية بتولد..يووه...مش هتهمد غير لما تاكله أنا عارفاها ثم التفتت لي و هي بتغمز : ماتيجي انت يا دكتور يا حلو.. جريت برة و قررت اني مش داخل المستشفي دي تاني قررت اني اعدي علي مستشفي الاطفال بالمرة...دخلت و امتلأت أذني من صراخ العيال... احدي النائبات : يا دكتورة الولد ده بيعيط أوي و شكله عنده مغص احدي المدرسات المساعدات : يا حرام..و عملتيلو حاجة؟ النائبة : لأ مانا مش عارفة..اعمل ايه؟ المدرسة : اديلو أي حاجة للمغص..معلش يا كوكو و بعد ساعة النائبة : الولد لسا بيعيط يا حرام المدرسة : يا حرام..طب خلاص بقي خلي أهله يودوه مستشفي ..خليهم يروحو أبو الريش تعجبت ومشيت كالعادة....؟؟؟ اليوم وجدت قسم الاشعة فاتح..الحمدلله...ووجدتهم قاعدين مع بعض و عاملين ديش بارتي..واضح اني لقيت اللي أنا عاوزه..قعدت معاهم ثم اقتربت من مدرس مساعد عشان اسأله علي شوية حاجات..لكني وجدته بيتكلم في التليفون المدرس المساعد : أيوة يا حبيبتي...ليه بس......طب و بعدين طيب تسيبي البيت ليه..... مانتي عارفة ان الخلفة دي قسمة و نصيب....و ده من الشغل يعني مش بايدي يا حبيبتي وطبعا فهمت السبب لأنهم كانوا قالولنا فى المحاضرات إن دكاترة الأشعة بيصابو بالعقم من الإشعاع حلو قوى لحد كده راودتني بعض الأفكار ثم ذهبت الي أحد النواب لأسأله عن الأساليب الوقائية من الاشعة في القسم فأجابني اني فاهم غلط و ان ( الواقي ) ده هلاقيه في قسم الجلدية....خرجت من القسم و أنا أنظر نظرة متأملة الي كل ذكر في القسم...لقد يأست من كل النيابات؟؟؟؟ هناك اشاعات تقول ان في نيابة جديدة نزلت هيسموها ( تسليك المخ و الاعصاب ) كرمز لتسليك الجلطات و الذي منه في المخ... و ان قسم جراحة المخ و الاعصاب هيتلغي..حلو أوي أنا ممكن أخد النيابة دي الاشاعات طلعت حقيقة و في نيابة نزلت كدة فعلا..أنا قررت أخدها بس الغريب ان ابن رئيس قسم جراحة المخ و الاعصاب أخد ( جراحة مخ و أعصاب ) مع ان ترتيبه كان بعيد عنها أوي...تقريبا عشان كل الاوائل بعدو عنها بعد الاشاعات..بس ليه يعمل كدة و أساسا قسم جراحة المخ و الاعصاب هيتلغي..غريبة !! و بعد أن اتضح ان قسم جراحة المخ و الاعصاب مش هيتلغي و ان قسم ( تسليك مخ و أعصاب ) خاص بتسليك بلاعات قسم جراحة المخ و الاعصاب...الأن أفكر جديا في ..... بصراااااحة لسه مش عارف تقريبا جالى mental block تصبحوا على خير....

من طرف جميله الإثنين 04 أبريل 2011, 11:14 pm

يا أنا

حرام عليك ههههههههههههههههه

بعت لنا نحن هون ال mental block

بالتوفيق إن شاء الله

من طرف nancy nabil الأربعاء 06 أبريل 2011, 11:43 am

لالالالالالالالا

دنا كده هتعقد

حرام دنا ليه فى أول الطريق

من طرف **سجده** الأربعاء 06 أبريل 2011, 7:31 pm

يا نهار ابيض !!!

ده انت لسه في الأول يا دكتور رائد

يعني لسه مشوفتش حاجه

وبعدين فكرتني بايام امتياز اللي ربنا ما يرجعها ابدا هههههههههههه

اقولكم موقف طريف علشان متتعقدوش وتعرفوا ان مصر لسه بخير

وانا في امتياز كان بيطلع روحي في الشغل لدرجة اني كنت بتاخر في الشغل وانزل بعد مواعيد الانصراف ساعات الاقي باب المبني مقفول عليا وبرده روحي تطلع علي ما اعرف اخرج

وفي يوم لطيف كالعاده الدكاتره خلصوا شغل وكله زوغ وانا قاعده بشتغل وكانت الساعه واحده الظهر

وخير اللهم اجعله خير ببص ورايا لقيت دكتور حاتم الجبلي

اه هوه بعينه وزير الصحه السابق ده

وسأل علي بقيت القسم بقي وانا مكنتش عارفه اقول ايه ههههههههههههه

المهم انا معروف عني وانا بشتغل ببقي عامله حواليا شرنقه لابسه البالطو والماسك وكنت لابسه 2 جوانتي

المهم لفله شويه في المبني ملاقاش دكتور فيه غيري

وتاني يوم لاقينا مدير المستشفي طالب اسمي من رئيسة القسم وقالها مكتب الوزير عاوز اسم الدكتوره اللي كانت بتشتغل في الاسنان

وكله بقي يكلمني ايوه يا عم

مكافاه ولا ترقيه ده غير العلاوات والذي منه

اللي يصبر ينول

يا محظوظه

وقاعدين بقي مستنيين المفاجآت

ولقينا مكتب الوزير باعت تقرير

وطبعا ذاكر اسمي فيه بلافخر ومكتوب فيه ان طبيبه الاسنان للأسف كانت لا ترتدي البالطوووووووووووووووو

وآدي اخرة الالتزام

وعمار يا وزارة الصحه

بجد هتعيشوا فيها احلي حياه

من طرف **نوسة** الخميس 07 أبريل 2011, 7:14 pm

هههههههههههههههههههههههههههههههههههههههههههههههههههههههههههههههههه بجد انا مش قادرة انا حاسة انك بتحكى مسرحية ههههههههههههههههههههههههههههههيا عينى ربنا يكون فى عونك

وفى عونك يا سجدة بجد ملكيش حق ههههههههههههههههههههههههه

يا عينى هو ده الطب فى مصر ربنا يرحمنا برحمته

من طرف **القلب الطائر** الخميس 07 أبريل 2011, 7:31 pm

الله اكبر هو دة الطب وهو دة الامتياز ياعييييييييينى عليكوا والله لينا واحد ابن صاحبة ماما فى الامتياز السنة دى ماكنتش اعرف انة بيتعذب كدا ربنا
معاه ومعاكوا وان شاء الله تلاقى تخصص مافيهوش مفرقعات ومجانين والتمساح الشرس وناس بتشتم انا مش عارفة اية هو ب ربنا يسهل وتلاقية

من طرف **لؤلؤة** الخميس 07 أبريل 2011, 11:05 pm

هههههههههههههههههههههههههههههههههههه
ياحرام لا بجد مش قادرة

عارف انا هروح دلوقتى اصلى ركعتين شكر على تخصصى
هههههههههههههههههههههههه

ربنبا يوفقك يا دكتور انت تستاهل كل خييييييييييييييير

من طرف Dr.Oraefy الأحد 10 أبريل 2011, 6:35 pm

نورتونى وشكرا ردردكم الجميلة والحمد لله أنا إخترت تخصص وربنا يسهل.....طب الأسرة...

من طرف **dandana ali** الأربعاء 13 أبريل 2011, 10:45 pm

ربنا يوفقك يادكتور ومعاك
لأن كتر خيركم فى اللى بتشوفوه

من طرف **عذاري** الثلاثاء 26 أبريل 2011, 1:50 pm

الله يوفقك

يسلموووووو

جزاك الله خيرا

مذكرات طبيب إمتياز

مذكرات طبيب إمتياز

رد: مذكرات طبيب إمتياز

رد: مذكرات طبيب إمتياز

رد: مذكرات طبيب إمتياز

رد: مذكرات طبيب إمتياز

رد: مذكرات طبيب إمتياز

رد: مذكرات طبيب إمتياز

رد: مذكرات طبيب إمتياز

رد: مذكرات طبيب إمتياز

رد: مذكرات طبيب إمتياز