هي دي مصر اللي لينا

هي دي مصر اللي لينا.. ( بالعامية المصرية )

الشاعر : سمير حسن الهواري

إنتخبت !؟

ولّا خبت !!ّ

لمّا شفت النايبه دايره

ع الشوارع والبيوت

وانت لو فكرت مرّه

تدي صوتك بالأمانه

راح تموت

إنت مالك !!

خد عيالك

لف بيهم ع الرصيف

مش هناك البلطجيه

يلّا إلحق خد رغيف

ما انت أصلا

مش هتاخد غير رغيف

إن أخدت !!

أصل سوق الفته داير

والضماير

ما انت عارف

لمّا يبقى الجوع مساومه

لمّا تبقى الحاجه ضلمه

والعنين متمشكلين

بالرزق واحوال العيال

والدنيا في درب الشباب

متلخبطه

ياهلترى

من أي باب يطلع خطا

وقلوب على لطف الكريم

متشعبطه

( مصر التي في خاطري وفي فمي .. أحبها من كل روحي ودمي )

هيَ كانت مصر لينا

إلّا ف اوقات الحروب

واحنا بنحوط عليها

دايره من نبض القلوب

لمّا صوت البوق ينادي

ياولادي

ياشباب مصر الكبار

تصرخ الغيره ف عروقنا

والعيون تقدح شرار

لمّا تشرب أرضها

من طهارة دمنا

لمّا هم الخوف عليها

يبقى أعظم همِّنا

هيَ دي مصر اللي لينا

لمّا تحتاجنا تنادينا

وتلاقينا

صوت ف جامع

أو ف ترنيمة كنيسه

خطو عيسى

فوق جناحك هزِّني

وف كياني شع نور المصطفى

طكب ليه ياست الكل

قلبك ما اصطفى

إلّا الصغار

اللي لبسوا بدمنا توب الكبار

ركبوا فوق حجر الطحونه

وانطحنا

وانبدرنا

ملح أرضك

لا وعرضك

واللي دابوا ف أرض سينا

يوم زفافك

والنهار اللي اتخطف

لحظة ما شافك

لنْحَنّي إيدك ياصبية عمرنا

ونطهر الأرض اللي مشتاقه لعفافك

ونرجعك من تاني لينا

مصر اللي بتدور علينا

نبدر الفرحه ف عينيكي

والأماني

والأغاني

للغلابه المحرمومين

نمشي تاني

نمشي تاني ياسفينه

نمشي والدفه ف إيدينا

ويغني ف عنيكي النهار .

ديسمبر 2010

من طرف **عذاري** الأحد 03 يوليو 2011, 8:03 pm

ياشباب مصر الكبار

تصرخ الغيره ف عروقنا

والعيون تقدح شرار

لمّا تشرب أرضها

من طهارة دمنا

لمّا هم الخوف عليها

يبقى أعظم همِّنا

هيَ دي مصر اللي لينا

كلام حلوووووووووووو كثييييييييير

يسلموووووووووووووو

جزاك الله خيرا

من طرف **dandana ali** السبت 09 يوليو 2011, 2:15 am

كلام حلو جدااااااااااااا

هي دي مصر اللي لينا

هي دي مصر اللي لينا

رد: هي دي مصر اللي لينا

رد: هي دي مصر اللي لينا