من كتاباتي

من طرف Dr.Oraefy الجمعة 27 أغسطس 2010, 9:15 pm

رسالة من مصري في الغربة...

مصري
وهفضل أتباهي
وأحب فيها..
وعمري ماأنساها
وأتغني بترابها
وأرضهاوسماها

يابلادي
لو في آخرالدنيا
هرجعلك
ولوفي يوم منعوني
من مكاني
هكتبلك
ورسالتي توصل
حتي قبل
ماأبعتلك
أصل البداية
حلمي كان عندك

أنا مصري عادي
حب بلده من قلبه
رغم اللي شافه
والزمن عانده
خلاه يسيبك
والبعد كان حاسه
وبدايته كان
واحد من الناس
طلب حقه

لاهو قال فلان
مالهوش طابور
وعادي لو كسرالمرور
ده قريبه أصله كان مأمور

ولاهو قال مصلحتي واقفه
ومن زمان
والمحاكم كل القضايا
في خبركان
ومن غيروسايط
ورقك مالهوش مكان
عمره ماقال إشمعني
أو حس إمتحان
ده الميه فيها
من الضرر ألوان
شارب وساكت
وأهوصابر علي الأحزان

يابلدي شفت فيكي
حاجات ماتتقال
و لو أقولها أغنيها
في ساعات موال
والمصري دايما..
للهموم شيال

سألوه في مره
عن أحلامه إيه هيه?
رد ببساطه
عيشه مكفيه
ماطلبش
تبقي الدنيا ورديه
ولاسلطه فاضيه
علي العباد مفتريه

ومرتباته أصلها
ماتجبش عيش
علي قدها
بيحاول يقدريعيش
لكن كمان
يدفع منها بقشيش
لموظفين ع المكاتب
بس شغل مفيش

وسألت شاب عن الجواز
منطقش صوت
عينه قالتلي ماخلاص
قرب القطريفوت
وألاقي نفسي
حلمي قدامي بيموت

أبسط حقوقي يابلدي
منها حرموني
ولأجل خاطرك
يابلدي ظلموني

إفتكرت أحلامي
اللي ضاعت ومن بدري
قبل ماأتغرب
وأسيب بلدي وأهلي

طيب ماأنا أرجع
وفي ترابهاراح أزرع
والنبت يطلع
والخيرهيكتر وهنوزع
لازم نجرب نحلم وجواها
أكيد هنبتدي نطلع
هنغير كتير..
لوأحلامنا تتجمع

أصل الكبارواللي فوق
هيشيلوا ليه همي
يابلدي سامحيني..
الهم زاد هتحملي عني
وإفتكري لأجل ترابك
في يوم فديتك بدمي

مش أنا المصري
اللي قالوا في الحروب عنه
وإتحاكوا بدفاعه
عن بلده وأمه
وإضريتيه يسافر
لكن كان غصب عنه

لكنه راجع
وأحلامه يشوف الليل نهار
ومن تاني نتغير..
يابلادي وأختار
أعيش معاكي
وأنسي حلمي
اللي خلاص إنهار
وأحلم ومن تاني
بس لازم بإصرار
مش بقولك يابلدي
مصري والله
وبحبك مش هزار.....

مصري والله
وبحبك مش هزار.....

من طرف **نوسة** الجمعة 27 أغسطس 2010, 10:17 pm

حلو اوووووووووى يا دكتور
تسلم ايديك

من طرف **لؤلؤة** الجمعة 27 أغسطس 2010, 10:44 pm

لكنه راجع
وأحلامه يشوف الليل نهار
ومن تاني نتغير..
يابلادي وأختار
أعيش معاكي
وأنسي حلمي
اللي خلاص إنهار
وأحلم ومن تاني
بس لازم بإصرار
مش بقولك يابلدي
مصري والله
وبحبك مش هزار.....

تحفة
ذوق راقى