طظ فيك

طول عمر البلد فيها كوسه ورشاوى

بس مش هى القانون

الظاهر ان الرشاوى بقيت قانون ماشى واللى بيخالفه بيتعاقب

بجد دمى أتحرق النهارده وأنا مروح البيت


يعنى مش كفايه الحر والصيام والطريق اللى واقف

كمان عسكرى المرور ..أقصد الباشا بتاع المرور

لو سمحت أركن على جنب أنت بتتكلم فى الموبايل
مخالفه

أيوه فعلا أنا كنت بتكلم فى الموبايل
عارف انى مخالف

بس الشىء الصاعق
العسكرى بيقولى هات 50 جنيه

فرديت عليه وقولتله اللى اعرفه انك بتاخد الرقم وخلاص
وبعدين مش انت اللى بتحصل المخالفات

وفوجئت برد فى منتهى البجاحه

أنت هتستهبل
؟؟؟؟؟
مش كفايه بتتكلم فى الموبايل وانت سايق
أنت بتخرب فى البلد ..مفيش عندك مسئوليه

والله تستاهل فعلا مخالفه ب 1000 جنيه
وهات الرخص بتاعتك
والله لأرميهالك تحت الكوبرى

وحاجات تانيه مقدرش أقولها
علشان ده مكان محترم

جاتنى صاعقه من الكلام
بجد أتصدمت وأتزهلت

وبعدين أنفعلت
طبعا الأنفعاله اللى انتم عارفينها اللى بترسى على الفاضى دى

وقولتله
هو أنت اللى هتقول عليا أنى بخرب البلد
دنت حتة مرتشى
احترم نفسك

يعنى عاوز تاخد رشوه
والله لوديك فى داهيه

فين الظابط ؟؟؟
فين رئيسك
أنا عاوز الظابط

جه واحد تخين كده
ايه عطلتت لينا المرور

اديله الفلوس وانت ساكت

نعم نعم

والظابط كمان

؟؟؟؟؟؟؟؟؟؟

اللهم إنى صايم

حتى الظابط مشارك مع العسكرى فى الرشوه

لا بقى انا مش هسكت

لقيت الظابط بيقولى
على فكره انا ممكن اعملك محضر تعدى على ظابط وأسجنك

قولتله العباره الشهيره
هو انت مش عارف أنت بتكلم مين ؟؟

قالى مين انت يعنى بتشتغل إيه ؟؟

قولتله أنا مهندس

قالى طظ

ملكوش قيمه

بتعملوا إيه ؟؟؟

هنا خلاص مقدرتش أمسك نفسى

وقولتله

أنت جاهل ولص ودخلت كليتك بالكوسه والرشوه علشان كده لازم تكون مرتشى وحرامى

المهندس ده يا جاهل على الأقل بيعمل حاجه ليها قيمه
مش مرتشى وحرامى زيك

المهم

احب أقولكم ان الموضوع أنتهى فى قسم الشرطه
وطلعت انا اللى غلطان

ودفعت الغرامه والرخص اتسحبت

يحيا العدل
يحيا العدل

بس الحمد لله

لم ادفع رشوه

يا خوفى يا مصر

الان بدأت أفهم كلمات صديقى الذى رفض العوده من الخارج
ولما قولتله نرجع بلدنا

قالى طيب أرجع وابقى سلملى عليها

يا خسااااااااااااااااااااااااااااااااااااااااااااااااره