أهلى أم رغبتى؟

السلام عليكم
 
للأسف عندى موضوع أحب أسمع أكتر من رأى فيه ودى حاجه بحب ديما أعملها
 
أنا أسمى توفيق وخلصت ثانويه عامه السنه دى
 
أصلا انا كان نفسى أدخل كلية الهندسه
 
لكن بابا وماما فضلو يضغطوا عليا أنى أختار رغبة علمى العلوم
 
لأنهم عاوزين أنى أطلع دكتور وانا بكره المهنه دى جدا
 
ولا يمكن أقدر أشتغلها
 
هى مهنه جليله
 
لكن أنا لا
 
مش هقدر
 
لكن هم فضلو يضغطوا عليا
 
أنا بحب الهندسه جدا
 
خصوصا مجال الأتصالات وحتى مع دراستى للبيولوجى فضلت أتابع هواياتى الهندسيه
 
ومفيش فرق بينى وبين اللى فى كلية هندسه
 
وساعات كمان بعرف أكتر منهم
 
والحمد لله ربنا أدانى موهبة أنى أتكيف مع مذاكرة أى شىء
 
وعلشان كده ربنا وفقنى ومجموعى يقدر يدخلنى كليه طب زى مهم عاوزين
 
لكن أنا شايف أنى هدمر لو أشتغلت دكتور
 
مع أنى ممكن أدخل الكليه وانجح وأنا واثق فى قدراتى
 
لكن ده شىء مش بحبه
 
أنا بحب المواد الهندسيه لكن خلاص فات الأوان
 
علشان كده فكرت أنى أدخل كليه صيدله
 
على الأقل أسهل من الطب بكتير وموادها أبسط
 
واهم شىء أنها منتهيه
 
يعنى مش لازم أحضر ماجيسترات ولا دكتورهات ولا كلام من ده
 
أنا عاوز اخلص وأنتهى بسرعه
 
وفى نفس الوقت هى كليه طبيه وهتحقق غرض أهلى
 
لكن هم رافضين
 
يا طب يا بلاش ههههههههههههه
 
بصراحه انا مش بقدر أزعلهم
 
لسبب وهو انى كان ليا تلاث أخوات وماتوا فى حادثه وأحنا صغيرين وانا بس اللى نجيت
 
الله يرحمهم
 
علشان كده
 
أنا بسمع كلامهم ديما
 
وفعلا أخذت قرارى خلاص
 
وهو أنى أنفذ رغبة أهلى
 
بس عاوز أسأل
 
هل قرارى ده صح ؟؟
 
وهل انى أدخل كليه الصيدله رغم عنهم يعتبر أن عاق لوالدى؟
 
وشكرا لكل اللى هيقول رأيه
 
وحابب أسمه أكتر من رأى
 
توفيق