بابا طلع معاش…و ماما لسة – أول يوم معاش

صباح الخير ..

حسن رايح الشغل .

سلاموا عليكوا ..هي رشا جت ولا لسه بره؟

ده البوء اللي بابي بيقولوا لما يرجع من الشغل.

و مرتين في الأسبوع بابي يروح الشغل تاني بعد الضهر.

بابي كان مشغول جدا و كلامه كان من دهب جدا فين و فين لما نسمع بابي يسأل في تفاصيل.

وفضلنا سنين ننام كلنا باليل و نام ونقوم و نقوم و نام على حب في حب.

و تمر السنون وبابا يطلع معاش!

بابا طلع معاش

صباح الخير

رشا راحت الشغل ؟

رامي صحي من النوم و لا لسه ؟ هو ماعندوش محاضرات؟

رضوان خد مصروفه و لا نسيتي يا ماجده ذي كل يوم؟ كل ده قالوا بابي في نفس واحد.

طبعا أكيد فاكرين رضوان جه السفرجي !

بابا حسن علشان كام متخانق مع ست الكل ماما ماجده لما حملت لتالت مره، أفش عليها و قرر يعاقب أخويا الصغير و سماه رضوان . من ساعتها لما بابي يأفش على مامي ماجده يناديها يا أم رضوان . و رضوان يا حبيبي يا خويا يعيط على أسمه اللي شبه أسم جدوا.

نرجع ليوم بابي حسن العسكري بعد تغيير التوقيت الشتوي لطلوعه على المعاش :-

من الساعه إتناشر الظهر للساعه أربعه حسن كل ساعه يكلم ماجده يشوفها هترجع إمتى من الشغل .

من الساعه أربعه لحد خامسه بيكلم رشا يشوفها فين كل ده !! مع إن رشا بترجع بقالها سنتين من شغلها الساعه سته .

ما بين إتناشرالظهر لحد سته لما يكون لا بيكلم مامي في شغلها و لا بيكلمني يدور عليا بيكون بيكلم رامي أخويا اللي في كلية التجاره ، يشوفوا هيغلط و يرد عليه فيأفشه مزوغ من المحاضرات .

و رامي الحويط ما بيردش خالص مع إنه في السايبر كافيه اللي في مدخل بيتنا .

أما حبيبي شهيد الحمل الغير مرغوب فيه أخويا الصغير رضوان بيرجع من المدرسه يا عين أمه يادوبك باي و هو بيفتحلوا باب البيت يمد إيده على شنطته السوبر مان و يطلع الواجبات و يسلي نفسه بزنقة رض رض (دلع رضوان) و يخلص معاه كل الهوم ورك و اللي مش هوم ورك لحد ما مامي ترجع و تخلص رض رض من إيد بابي.



و تستمر الحياه بين إبتسامه و أه

فيها اللي طلع معاش و فيها اللي تاه في خطاه (اللي هو إحنا إنشاء الله) .



و تمر الأيامززززز و ماجده بتشتغل و حسن العسكري لاء و هو بيقول :-

“كلها كام يوم و ماجده تعرف تاخد أجازه من الشغل و اخدها و اطلع اعيشلي يومين في إسكندريه…ياااااه إمتى بأه “.

وإحنا في نفس واحد

” إمتى بابا هياخد ماجده و يروحوا إسكندريه بأه ؟؟؟ “.



منقووووووووووووووووووووووووووووووووووووووووووول

ده حسن وجوده في البيت امان وبركه

ربنا يباركلكم في عمر حسن ومتتحرموش منه يا ولاد دا الحرمان منه صععععععععععععععععععععععب جدا بس انتو مش حاسين

تسلمي يا قلب علي موضوعك الخفيف

ميرسى يا سجدة بس برضة ساعات حسن بيخنق حبة بس اكيد وجودة اماااااااااااااااااااااااااااااااااااااان طبعا ربنا يخل كل اب لاولادة