مش عارف أعمل ايه؟

السلام عليكم

مشكلتى التى أريد ان اسمع رأيكم فيها

أنا زوجتى دكتوره

واحنا متجوزينن من 5 سنين

انا بحبها من أيام الثانوى

وفضلت احبها

وأستنيتها لما خلصت الكليه الطويله دى لانها رفضت تتجوز أثناء الدراسه

انا بشتغل صيدلى يعن تقريبا فى نفس المجال

وكنت مفكر كده

أننا فى نفس المجال

لكن اللى لقيته ان فى فرق كبير جدا

انا يدوبك بخلص شغلى وبرجع بصراحه مش بتعب خالص

يعنى قاعد على كرسى طول النهار

فى الصيدليه

أما هى بتشتغل فى تخصص الطوارىء

ليل نهار حوادث وشد عصبى الخ

المشكله هى

انى لما بروح ليها المستشفى بلاقيها بتتكلم مع دكاتره رجاله

بحس بخنقه شديده جدا

مع ان كلامهم بيبقى فى الشغل وكل حاجه

وكلهم ناس محترمين

بس انا مش بقدر امسك نفسى

بتخنق

لأن شغعلها مشترك مع دكاتره

وبحس انهم احسن منى

مش عارف انا معقد ولا أيه

بس انا أتعاركت معاها كتير فى الفتره الأخيره

وكل أصحابى بيقولولى انى انفصل عنها

بس انا أخر حاجه خيرتها بينى وبين انها تشتغل دكتوره

وخايف انها تختار شغلها

هندم جدا

وهحس بعجز رهيب

لأنى لو هى أختارت الشغل مش هقدر أرجعلها تانى لأن كرامتى هتوجعنى

وفى نفس الوقت هعيش فى عذاب

لأنى مقدرش أعيش من غيرها

لانى بحبها

بس انا خلاص قولتلها أختارى بينى وبين شغلك

وهى قالتلى أدينى مهله أسبوعين أقضيهم فى هدوء

مش عارف اعمل ايه ؟؟

أنتظر ولا أقطع الأنتظار ؟؟

شكرا ليكم على كلامكم

مكنتش نتوقع الاهتمام ده

بس انا حيران لسه ومش عارف اعمل ايه فاضل خمس ايام فى المهله اللى اتفقنا عليها

بجد انا حيران

على فكره بجد كنت عاوز أشكركم جدا

لانى بجد نفذت كلامكم بنسبه كبيره

وانا ومراتى أتصالحنا وبنقضى شهر عسل جديد دلوقتى

بجد انا حاسس انى كنت وسط ازمه ومش شايف

وانتوا وضحتولى حاجات مكنتش واخد بالى منها

بجد شكرا ليكم