على ذاك الطريق

من طرف **عذاري** الثلاثاء 28 سبتمبر 2010, 11:49 pm

على ذاك الطريق

على ذاك الطريق اللي يسمونه غـرام أحبـاب

وطت رجلي على دربه ولا أدري وش نوى فيني

تبعته لآخر دروبه .. ألين أن القمر قـد غـاب

تعـب قلبـي ، ولا تعبـت مسافـاتٍ تودينـي

لقيت الليلة الجردا : هدب ظل وسما وأعشاب

بعـد ذاك الظـلام اللـي يتوهنـي عناوينـي

صدفتك معجبة فيني ويا ليت..الغرام : أعجاب

وتراك أنتي الهنوف اللـي هقيتـك تستحقينـي

عطيتك عشق من قلبي..وسلمت لغـلاك رقـاب

وغيـرك يحتـرق قلبـه ولا يقـدر يحاكينـي

أنا قبلك صدفت عيون لكن ويش جاب لجـاب؟

ترى كل العيـون اللـي لقتنـي مـا تكفينـي

رماني حظي العاثر عليك وجيـت لـك طـلاب

ولا أنتي اللي عشقتيني ولا انتي اللي عتقتيني

تعالي واعتقي ذاك الخفـوق المولـع المرتـاب

مهب لأجلي ، عشان الله يجازيـك ويجازينـي

تعدي في سما عشقي ولو عشقي خراب أصحاب

وصوني بالهوى نفسك قبل لا انتي تصونينـي

وشيليني على متنك : خفوقٍ بـاريٍ منصـاب

ومن فوق الغرام العذب .. شيلينـي وحطينـي

ولا منك هقيتيني شجـاع ومـا يطيـق يهـاب

أنا لك بالهوى والله مثل مـا انتـي هقيتينـي

أنا ما أمشي ورا غيرك ولو أنه يطـق البـاب

وترى عيبٍ عليّ أطعن..ولو كثـرت سكاكينـي

زهودٍ مـا يطيـق الـدم لا دايـن ولا طـلاب

شجاع وعارفٍ نفسـي وأظـن أنـك تعرفينـي

غيورٍ ما عرفت أضحك مع الغدر ببّرود أعصـاب

أبيع عيونـي الثنتين قبـل أنـك تخونينـي

إذا شد الغرام .. اترك خفوقي : بين ناب وناب

لفرقى تكسر ضلوعي .. ولا عشـقٍ يوطّينـي

أنا رجلٍ ولي غيره .. وإذا شفت الهوى كـذاب

تثـور بقلبـي الفزعة ولا تهـدى شياطينـي

سؤالك لو يزعزع بي كياني ما قبلـت عتـاب

اجي لك وأسالك نفس السؤال اللـي سألتينـي

عن العشق القديم أبواب .. تقفيها كثير أبـواب

بعد ذاك الحبيب اللي خدعنـي وانخـدع فينـي

أبي عشق تحسب له كل نظرات العيون حساب

وابي قلبٍ علي قلبي ، وابى دينٍ علـى دينـي

وابي نظرة عطا توفي ولا تخلف بدون أسبـاب

وابي منك قبل لا نتـي تصدينـي .. تودينـي

وابي دربٍ على العذال صعبٍ ومتعـبٍ وغـلاب

وابي نفس الطريق الصعب يبعدهـم ويدنينـي

ترى لو للقلوب عيون ولدموع العيون أهـداب

حشى ما تنزل الدمعة لغيـرك لـو تركتينـي

أنا أول من عرف قدرك وأنا توي صغير وشاب

وابي منـك مـا دام أنـك عرفتينـي تحبينـي

ما دام أني لقيتك في طريق أسمه غرام أحبـاب

دخيل الله ، وبعـد الله دخيلـك .. لا تخلينـي

ما دام أن كل من يحيا على وجه التراب تـراب

عسى تنساني الدنيـا مـادام أنتـي ذكرتينـي

لشاعر حامد زيد

السلام عليكم ورحمة الله وبركاته

عذاري

كلمات رائعة

تسلم يديك

شكرا لك

سلاااااااااام

من طرف **عذاري** الأربعاء 29 سبتمبر 2010, 2:26 pm

أميرة بكلمتي كتب:السلام عليكم ورحمة الله وبركاته

عذاري

كلمات رائعة

تسلم يديك

شكرا لك

سلاااااااااام

وعليكم السلام ورحمة الله وبركاته
الله يسلمك
اميرة بكلمتي
نورتي الموضوع
جزاكي الله خيرا

على ذاك الطريق

على ذاك الطريق

رد: على ذاك الطريق

رد: على ذاك الطريق